Loading...
Loading...
SEÇMƏ

Ramin Hacılı məhkəmədə ölüm aclığına başladığını açıqlayıb

Azərbaycan Avropa Hərəkatı”nın sədri Ramin Hacılı həbsdə aclıq aksiyasına başladığını bildirib.

Deyib ki, həbsdə əsassız ittihamlarla saxlanılır, hüquqları pozulur. Onun sözlərinə görə, məhkəmə işinə obyektiv, ədalətli baxmır.

“Hüquqlarım bərpa edilənədək ölüm aclığını davam etdirmək niyyətindəyəm”.

Dələduzluq, qanunsuz miqrasiyanın təşkili, saxta sənədlər hazırlama və onlardan istifadə etmə kimi əməllərdə ittiham olunan Ramin Hacılının mühakiməsi Bakı Ağır Cinayətlər Məhkəməsində gedir.

Ramin Hacılı iyunun 22-də hakim Azad Məcidovun sədrliyilə keçirilən məhkəmədə işinin istintaqının yenidən aparılması üçün prokurorluğa qaytarılması barədə vəsatət qaldırıb.

O bildirib ki, bundan əvvəlki istintaq qərəzli, natamam olub.

Məsələn, ona mütəşəkkil dəstə tərkibində dələduzluq ittihamı verilsə də, bu dəstənin kimlərdən ibarət olduğu, rəhbəri, pay bölgüsü kimi məsələlər məlum deyil:

“İş materiallarında bu ittihamlarla bağlı heç bir sübut yoxdur”.

Hakimlər onun bu vəsatətini təmin etməyib.

Ramin Hacılı heç olmasa, məhkəmənin yekun hökmü çıxarılanadək ev dustaqlığına buraxılmasını istəyib, bu barədə də vəsatət qaldırıb. Lakin bu vəsatəti də təmin olunmayıb.

Hakimlərin onun işinə qərəzli yanaşdığını, danışmağa, sözünü deməyə imkan verilmədiyini, ötən məhkəmə iclasında onun işinə baxıldığı halda, başqa şəxsə aid cinayət işinin müzakirə olunduğunu əsas gətirən Ramin Hacılı Azad Məcidov, Səbuhi Hüseynov və Zeynal Ağayevdən ibarət hakimlər kollegiyasına etiraz edib.

Deyib ki, işinə bu məhkəmə tərkibinin baxmasını istəmir, lakin onun bu etirazı da təmin olunmayıb.

Bundan sonra o, aclıq aksiyasına başladığını açıqlayıb: “Hüquqlarım bərpa olunanadək ölüm aclığını davam etdirəcəyəm”, – deyib.

Sonra şahidlərin dindirilməsi mərhələsi başlayıb.

Dindirilən şahid Azər Əliyev bildirib ki, Ramin Hacılı ona və qardaşına Kanadaya getməyə yardım edəcəyinə söz verib:

“Əvvəlcə 3 min, sonra 2 min dollar verdik. Dedi ki, siyahıda adam çoxdur, mümkündürsə, qalanını da indidən verək. Ona inandım, fikirləşdim ki, əvvəl-axır bu pulu verəcəyəm. 11 min 250 manat da sonra verdim. Hərçənd danışığımız belə olmuşdu ki, pulun qalanını vizanı alandan sonra verim. Lakin istədi, mən də verdim. Pulu vermək üçün evimi satmışdım, bu gün kirayələrdəyəm. Buna görə ailəm də dağıldı, sonra çox çətinliklə barışdıq”.

“Bu adam 4-5 ildir başıma corab hörür. Dedim ki, evsiz qalmışam, lap aylara bölək, hissə-hissə qaytar. Gah dedi iclasdayam, gah telefon götürmədi. Bir dəfə dedi ki, taksi ilə pul göndərirəm. Taksi gətirib, baxıram ki, 100 manat pul göndərib…” – deyə şahid bildirib.

Onunla Ramin Hacılı arasında sual-cavab zamanı qalmaqal yaranıb.

Gözdən qaçırmayın:  Rusiya “Xatirə və Kədər Günü”ndə Ukraynanın şərqini vurur

Onunla Ramin Hacılı arasında sual-cavab zamanı qalmaqal yaranıb.

Təqsirləndirilən şəxs iddia edib ki, Azər Əliyev və onun kimilər məhkəməyə öyrədilib göndərilib.

Saxlandığı şüşə kabinənin içində divara yumruq vuran Ramin Hacılının bu hərəkəti və qışqırmasından sonra hakim onun məhkəmə zalından çıxarılması üçün Penitensiar Xidmətin əməkdaşlarına göstəriş verib.

O, məhkəmə zalından çıxarılıb.

Ramin Hacılı özünün iştirakı olmadan prosesin davam etdirilməsinə etirazını bildirsə də, nəzərə alınmayıb.

Prosesin davamında şahid Pənah Hüseynli dindirilib. O bildirib ki, Amerikaya təhsil vizası almaq üçün Ramin Hacılıya 800 manat verib. Lakin sonradan fikrindən daşınıb və pulunu geri istəyib.

Şahidin sözlərinə görə, pulu qaytarılıb.

Məhkəmə prosesi iyunun 29-da davam edəcək.

İttihamda göstərilib ki, viza almaq prosesində Macarıstan, Latviya və başqa ölkələrin Azərbaycandakı səfirliklərinə həmin şəxslərin iş yeri, bankda vəsaiti haqda saxta sənədlər təqdim olunub.

Ramin Hacılı müxtəlif şəxslərdən pul alıb, onları aldatmaqda təqsirləndirilir.

Meydan TV

This site uses Akismet to reduce spam. Learn how your comment data is processed.

Back to top button