Rusiyanın neft və qaz gəlirləri azalır
Yayımlandı: 2 Mart 2023 13:36
BEA bunu Qərbin Ukraynaya görə tətbiq etdiyi sanksiyalarla əlaqələndirir
Qərbin sanksiyaları nəticəsində Rusiyanın neft və qaz gəlirləri yanvarda təxminən 40 faiz azalıb.
Beynəlxalq Enerji Agentliyinin (BEA) hesabatında belə qeyd edilir.
BEA-nın “Reuters” ilə paylaşdığı rəqəmlərə görə, yanvarda Rusiyanın neft və qaz ixracından əldə etdiyi gəlirlər 18,5 milyard dollar olub.
Bu, Rusiyanın Ukraynanı işğal etməsindən bir ay əvvəl, 2022-ci ilin yanvarında aldığı 30 milyard dollardan 38 faiz azdır.
BEA-nın icraçı direktoru Fatih Birol bildirib ki, Qərbin Rusiyanın enerji ixracını hədəfləyən tədbirləri neft bazarlarını sabitləşdirmək və Moskvanın neft və qaz ixracından əldə etdiyi gəlirləri azaltmaq məqsədinə nail olub.
“Bizim gözləntimiz ondan ibarətdir ki, neft və qaz gəlirlərindəki bu azalma gələcək aylarda daha kəskin olacaq. Texnologiyaya və investisiyaya çıxışın olmaması nəticəsində ortamüddətli perspektivdə daha da kəskinləşəcək”, – Birol “Reuters”ə bildirib.
Ukrayna müharibəsinə cavab olaraq Rusiyaya qarşı tətbiq edilən beynəlxalq məhdudiyyətlər, o cümlədən “Böyük Yeddilik” (G7) ölkələri tərəfindən qoyulmuş 60 dollarlıq xam neftin qiyməti həddi, Rusiyanın “Urals” qarışığının endirimlə satılmasına səbəb olub.
27 ölkədən ibarət Avropa İttifaqı (Aİ) dekabr ayından etibarən Rusiyanın dəniz neftinin idxalına qadağa qoyub.
Neft emalı üçün lazım olan texnologiyaların Rusiyaya ixracına da sanksiyalar tətbiq edilib.
ABŞ və Britaniya da Rusiya neftinin idxalına məhdudiyyətlər qoyub.
Moskva büdcə xərclərini maliyyələşdirmək üçün neft və qazdan əldə olunan gəlirə – keçən il təxminən 11,6 trilyon rubla (154,68 milyard dollar) arxalanır.
Eyni zamanda, Rusiya Ukraynaya təcavüzü nəticəsində artan kəsiri ödəmək üçün beynəlxalq ehtiyatları satmağa məcbur olub.
Moskvanın 2022-ci ilin fevralında Ukraynaya müdaxiləsindən sonra Aİ-yə boru kəməri tədarükünü kəsdikdən sonra Avropa Rusiya qazından imtina etmək üçün yarışır. Bu da Avropa qaz qiymətlərini rekord həddə çatdırıb.
Birol bildirib ki, Aİ ölkələri keçən il enerji təhlükəsizliyinin yaxşılaşdırılması, o cümlədən qalıq yanacağa ehtiyacı azaltmaq üçün bərpa olunan enerji və istilik nasoslarının sürətlə genişləndirilməsi sahəsində irəliləyiş əldə ediblər. Lakin o, risklərin qaldığını və ölkələrin enerjiyə qənaət etmək və təchizatı qorumaq üçün səylərini davam etdirməli olduğunu söyləyib.
Avropanın kifayət qədər qaz təmin etmək qabiliyyəti Çindən artan tələblə və ya Rusiya hələ də Avropaya göndərdiyi qazı kəsərsə, problemlə üzləşə bilər.
“Keçən il olduğu kimi bu il də asılılığın azaldılması sahəsində çalışqan olmaq üçün bütün səbəblər var”, – Birol belə deyib.
