“Sədərək” Ticarət Mərkəzində yanğın baş verdiyi bildirilir
Yayımlandı: 8 Yanvar 2023 20:08
Sahibkar: “Mənə dedilər ki, yanğın hansısa tekstil mağazasında baş verib”
Yanvarın 8-də Bakının Qaradağ rayonunda yerləşən “Sədərək” Ticarət Mərkəzində yanğın başlayıb.
Bu barədə məlumat yayan Fövqəladə Hallar Nazirliyi (FHN) bildirib ki, Dövlət Yanğından Mühafizə Xidmətinin yanğından mühafizə bölmələri və Xüsusi Riskli Xilasetmə Xidmətinin müvafiq xilasetmə qüvvələri çağırış üzrə cəlb olunub.
Ticarət mərkəzində çalışan və adının açıqlanmasını istəməyən mənbə bildirir ki, yanğın “Şirniyyat bazarı” deyilən ərazidə baş verib:
“Yoldayam, gedirəm. Elə evə təzəcə gəlmişdim ki, zəng etdilər ki, mənim mağazama yaxın sırada yanğın çıxıb. Mənim mağazam 17-ci sıradadır. Daha bilmirəm, bəlkə də bizim sıradır, həyəcanlanmayaq deyə gizlədirlər. Mənə dedilər ki, yanğın hansısa tekstil (dəsmal, pastel, yorğan, yasdıq) mağazasında baş verib”.
Mənbə bildirib ki, özü də mağazasını yenicə təmir etdirib:
“Bizə dedilər ki, bütün mağazalar şüşəli olmalıdır. Elə öz hesabımıza təmir etdirdik, içi də dolu malla”.
Bu, ticarət mərkəzində baş verən ilk yanğın deyil. 2020-ci ilin fevralında da burada yanğın baş vermişdi.
Yanğın nəticəsində təxminən 50-yə yaxın ticarət obyektinə ziyan dəymişdi.
