Sergey Lavrov: “Bir neçə məsələ qalıb, lakin bu məsələlər ən çətinidir”
Hikmət Hacızadə: “Əsas məqsəd Rusiyanın öz ordusunu Azərbaycana qaytarmaq istəməsidir”
Rusiyanın xarici işlər naziri Sergey Lavrovun Ermənistanda nəşr olunan “Novoye vremya” qəzetində məqaləsi dərc edilib. S.Lavrov məqalədə qeyd edib ki, Rusiya Dağlıq Qarabağ münaqişəsi üzrə nizamlanma prosesinin aktiv iştirakçısıdır.
APA-nın məlumatına görə, iki ölkə arasında diplomatik münasibətlərin qurulmasının 25 illiyinə həsr olunmuş yazısında S. Lavrov bu barədə bildirib. XİN rəsmisi deyib ki, Rusiya digər həmsədr ölkələr olan Fransa və ABŞ-la birlikdə tərəflərə münaqişənin davamlı həllinə nail olmaq istiqamətində kömək edir:
“Bu məsələnin həlli üçün ötən ilin yayında Rusiya prezidentinin təşəbbüsü ilə Sankt-Peterburqda üçtərəfli sammit keçirilib. Dağlıq Qarabağ münaqişəsinin tənzimlənməsi məsələsi Rusiya prezidenti Vladimir Putinin Azərbaycan və Ermənistan prezidentləri ilə ikitərəfli görüşlərində və xarici işlər nazirləri arasında çoxsaylı təmaslar zamanı müzakirə olunur. Bir sıra razılıqlar əldə olunur. Bir neçə məsələ qalıb, lakin bu məsələlər ən çətinidir. İşin nəticəsi ilk növbədə tərəflərin siyasi iradəsindən, kompromisli qərara hazır olmasından və uyumluluq nümayiş etdirməsindən asılıdır”.
Politoloq Hikmət Hacızadə Azadlıq.info-ya açıqlamasında Dağlıq Qarabağ münaqişəsinin tənzimlənməsində Rusiyanın öz niyyətinin olduğunu deyir. Politoloqa görə, əsas məqsəd Rusiyanın öz ordusunu Azərbaycana qaytarmaq istəməsidir:
“Rusiya Dağlıq Qarabağ münaqişəsinin nizamlanmasında səmimi mövqe nümayiş etdirmir. Onun yenə də erməniləri qorumaq niyyəti var. Rayonların qaytarılmasından sonra Rusiya özünün sülhməramlılarını yerləşdirmək niyyətini güdür. Əsas məqsəd bu olsa da, məsələ hələlik dalana dirənib. Azərbaycan hazırda buna razılıq vermir. Nəticənin necə olacağını da indidən demək mümkün deyil”.
Nigar
24saat.org
Mənbə – azadliq.info