Loading...
Loading...
Xəbərlər

Tbilisidə Avropaya inteqrasiya tələbi ilə müddətsiz etiraz…

Tbilisidə Gürcüstanın bütün regionlarından on minlərlə insan “Xəcalət” QHT rəhbərlərinin Gürcüstan hakimiyyətinə verdiyi 7 günlük ultimatum müddəti başa çatdıqdan sonra yenidən mərkəzi Rustaveli prospektində, parlament binasının yaxınlığında toplaşıb. Bir həftə əvvəl məhz onlar “Evə-Avropaya” kütləvi ictimai hərəkatının təşəbbüskarı olublar.

Ultimatuma əsasən, baş nazir İrakli Qaribaşvili bazar gününə qədər istefa, hakim “Gürcü arzusu” partiyası isə Aİ-nin 12 şərtini yerinə yetirmək üçün xalqın etimadına malik “texniki hökumət”in yaradılmasına razılıq verməli idi.

Aksiyada Qaribaşvili hökuməti istefa verənə qədər mitinqin davam etdirilməsi ilə bağlı qərar oxunub. Mitinq dinc şəraitdə, gürcü və Ukrayna mahnılarının sədaları altında keçirilir.

İyunun 17-də Avropa Komissiyasının rəhbəri Ursula von der Layen Ukrayna və Moldovaya Aİ üzvlüyünə namizəd statusunun verildiyini açıqlayıb. Gürcüstana status almaq üçün bir sıra şərtləri yerinə yetirmək tapşırılıb. O cümlədən, siyasi və iqtisadi həyatın deoliqarxizasiyası, depolarizasiya, məhkəmə islahatlarının müstəqilliyinin təmin edilməsi və jurnalistlərin, eləcə də müxtəlif azlıqların hüquqlarının müdafiəsi də daxil, ölkədə bir sıra sistemli islahatlar aparılmalıdır.

Baş nazir Qaribaşvili istefa verməkdən imtina edib, hakim partiyanın sədri İrakli Kobaxidze isə müxalifətə Aİ-nin şərtlərini mərhələli şəkildə yerinə yetirmək üçün bir neçə parlament komissiyası yaratmağı təklif edib.

Müxalifət partiyalarının liderləri, o cümlədən onların ən böyüyü – Mixail Saakaşvilinin Vahid Milli Hərəkatı “Gürcü arzusu” ilə istənilən danışıqları “mənasız” hesab edir.

AzadliqRadiosu

Gözdən qaçırmayın:  Şoyqu Putinə 'LNR-nin azad edilməsi haqqında' məruzə edib

This site uses Akismet to reduce spam. Learn how your comment data is processed.

Back to top button