Tofiq Yaqublunun qızı: “Polis telefonu anamın əlindən alıb…”
Müsavat Partiyası və Milli Şüranın Koordinasiya Mərkəzinin həbsdə olan üzvü Tofiq Yaqublunun telefonun alındığı və qaytarılmadığı bildirilir.
Bu barədə onun qızı Nigar Həzi məlumat verib.
“Martın 22-də polisi hadisə yerinə atam özü çağırıb və polis gələndən sonra maşından düşüb. Video da, foto şəkillər də var ki, atam telefonla çəkilişlər edir, polis də yanında oturur”, deyə o qeyd edib.
Nigar Həzi daha sonra da bunları əlavə edib:
“Polis İdarəsinin həyətində atam telefonu anama vermək istəyəndə, polis telefonu anamın əlindən alıb və hələ indiyə kimi qaytarmayıb”
“Əgər facebook səhifəsindən statuslarını siliblərsə…”
N.Həzi vurğulayıb ki, Tofiq Yaqublunun vəkili Apellyasiya şikayəti verməyə hazırlaşır və telefonun qaytarılmaması məsələsi də şikayətdə yer alacaq.
Amma N.Həzi güman edir ki, atasının telefonunda hadisə ilə bağlı bütün video və foto kadrları pozublar:
“Əgər, telefon vasitəsilə atamın facebook səhifəsinə daxil olaraq statuslarını siliblərsə, deməli telefondakı görüntüləri də siliblər”.
Vəkil: T.Yaqublu bunu “oyun” sayır
Vəkil Elçin Sadıqov isə deyib ki, martın 27-də Şüvəlandakı 3 saylı İstintaq Təcridxanasında saxlanan T.Yaqbulu ilə görüşüb. Onun sözlərinə görə, hüquqlarını müdafiə etdiyi şəxsin əhvalı yaxşıdır:
“İttihamı uydurma, qurulmuş oyun adlandırır ”
E.Sadıqov deyib ki, Nizami Rayon Nəhkəməsinin T.Yaqublu ilə bağlı həbs qət-imkan tədbiri qərarından və müdafiə etdiyi şəxsin telefonunun qaytarılmamasından şikayət verib, yaxın günlərdə şikayətə Bakı Şəhər Apellyasiya Məhkəməsində baxılacağı gözlənir.
Hələlik, Tofiq Yaqublunun telefonunun qaytarılmaması və facebook səhifəsində statusların silinməsi ilə bağlı deyilənlərə Daxili İşlər Nazirliyi və başqa rəsmi qurumlardan münasibə almaq mümkün olmayıb.
Deputat Fazil Mustafa isə bu məsələ ilə bağlı “ Turan” agentliyinə deyib ki, belədə telefonun qaytarılmaması o halda ola bilər ki, onunla bağlı hansısa danışıqların araşdırılması barədə ya məhkəmnin ya da müstəntiqin qərarı olsun:
“Bu halda saxlanıla bilər. Çünki, hansısa danışıqların mətnini araşdırma zərurəti yaranıbsa, bu mümkündür. Bu da ancaq qərar və qərardadla olmalıdır. Əgər bu barədə qərar və ya qərardad yoxdursa o zaman əmlak sahıbinə qaytarılmalıdır”.
Azadlıq Radiosu
24saat.org
Mənbə – azadliq.info
