ABŞ dondurucu qar fırtınası ilə mübarizə aparır. Milli Hava Xidməti (NWS) Şimal qütbündən gələn və ölkənin təxminən üçdə ikisini təsir edən dondurucu küləklərin həftə sonu ölkənin mərkəzi və şərq hissələrinə təsirini davam etdirəcəyini açıqlayıb.
Əlverişsiz hava şəraiti nəticəsində ölkədə çoxsaylı qəzalar baş verib. Oklahoma, Kentukki, Missuri, Tennessi, Viskonsin, Kanzas, Nebraska və Ohayo ştatlarında qar fırtınası nəticəsində baş verən qəzalarda ən azı 17 nəfər ölüb. Milli Meteoroloji Xidmətin (NWS) verdiyi açıqlamada sabah təsirini göstərməsi gözlənilən qar fırtınası səbəbiylə səyahətin son dərəcə riskli ola biləcəyi ifadə edildi.
Əksəriyyəti zəncirvarı halında baş verən yol qəzalarında çoxlu sayda insan yaralansa da, səlahiyyətlilər bəzi bölgələrdə saatda 115 kilometrə çatan qar fırtınası səbəbindən görmə məsafəsinin sıfıra endiyi barədə xəbərdarlıq edib.
Poweroutage saytının məlumatına görə, ölkə daxilində 1,7 milyondan çox ev və iş yeri elektriksiz qalıb, rəsmilər isə davam edən əlverişsiz hava şəraiti səbəbindən nasazlıqların təmirinin günlər çəkə biləcəyi barədə xəbərdarlıq ediblər.
ABŞ-da 200 milyondan çox insanın şaxtalı soyuqdan təsirlənəcəyi təxmin edilərkən, soyuğun Kanada sərhədindən Meksika sərhədinə qədər təsirli ola biləcəyi qeyd edildi.
Fırtına səbəbiylə ölkənin orta qərb hissəsindəki Montana, Cənubi Dakota və Vayominq ştatlarında temperaturun 45 dərəcə aşağı düşdüyü bildirilib.
Nyu-York, Virciniya, Kentukki, Corciya, Şimali Karolina və Oklahoma da daxil olmaqla bir sıra ştatlarda fövqəladə vəziyyət elan olunsa da, ABŞ prezidenti Co Bayden vətəndaşları xəbərdarlıqlara diqqət yetirməyə çağırıb.
Uçuş izləmə saytı FlightAware bildirdi ki, ilin ən sıx səyahət vaxtlarından biri olan Milad bayramı öncəsi 8000-dən çox uçuş ləğv edilib və 25000-dən çox uçuş gecikib.
Uçuşları ləğv edilən və ya gecikən amerikalılar hava limanlarında ilişib qaldıqları halda, səlahiyyətlilər hava şəraitini nəzərə alaraq vətəndaşlara təhlükəsiz Milad tətili üçün lazım olmadıqca evlərini tərk etməməyi tövsiyə edib.
ABŞ-da dekabrın 21-də milli və yerli meteoroloji hesabat agentlikləri “nəsildə bir dəfə” şiddətli soyuq və qar şəraiti barədə xəbərdarlıq edib.
Milli Hava Xidməti (NOAA) ölkənin bəzi bölgələrində son 40 ildə yaşanmayan soyuq hava şəraitinin yaxınlaşdığını açıqlayıb.
Meteoroloji xidmət, “güclü qarın səyahəti çox çətin və ya qeyri-mümkün edə biləcəyinə və həyat üçün təhlükə yarada biləcəyinə” işarə etdi.
Bundan əlavə, soyuq havanın təsiri ilə baş verəcək fırtınanın ölkənin Kanada sərhədindəki Böyük Göllər bölgəsində 3-cü kateqoriya qasırğasının təzyiqinə bərabər olacağı paylaşılıb.
Fırtına səbəbiylə Nyu Cersinin Manhettenə baxan sahil zolağında bəzi xəstəxanaların və müəssisələrin birinci mərtəbələri daşqın Hudson çayı tərəfindən su altında qalıb, daşqına məruz qalan bir çox avtomobil isə zədələnib.
Kvins və Bruklin sahil bölgələri də okean sularının yüksəlməsi nəticəsində zərər görüb, güclü küləklərin gətirdiyi dalğalar bəzi sahil küçələrini və yaşayış yerlərini yararsız hala salıb. (AA-İHA)
Tərcümə“24 SAAT”
