Saytların yığılması

Siyasi məhbuslar içərisində jurnalist, bloger, ictimai fəal, dindar, şair, yazarlar var

“Siyasi məhbus siyahısı” yenilənib. Məlumatı Siyasi Məhbusların Vahid Siyahısının hazırlanması üzrə İşçi Qrup yayıb.

Qrup bildirir ki, aparılan araşdırmalar nəticəsində cinayət təqibində siyasi motivlərin olduğu müəyyən olunan siyasi məhbuslar bölməsindəki şəxslərin sayı 147 nəfərdir.
“Onlardan 97-si inanclı fəal, 11-i siyasi və ictimai fəal, 11-i sosial etirazlarla bağlı həbs olunan, 10-u Səid Dadaşbəylinin qrupuna daxil olan, 7-si jurnalist və bloger, 3-ü ömürlük həbs olunan, 3-ü siyasi girov, 2-si şair və yazar, 2-si keçmiş məmur, 1-i hüquq müdafiəçisidir”.

Məlumatda qeyd edilir ki, həbslərinin siyasi motivliliyi barədə ehtimalların olmasına baxmayaraq, əlavə məlumatlara və araşdırmalara ehtiyac yarandığı üçün İşçi Qrup 6 məhbusun adını “işləri monitorinq altında olanlar” bölməsinə salıb.

“Martda əfv olunan 8 nəfərin adı siyahıdan çıxarılıb. Siyahı üzərində işi davam etdiririk. Növbəti yenilənmə barədə ictimaiyyəti məlumatlandıracağıq”.

Azərbaycanda 2 siyasi məhbus siyahısı var. Digər, Siyasi Məhbusların Müdafiə Mərkəzinin aprelin 1-də açıqladığı siyahıda 162 nəfərin adı var.

Siyasi Məhbusların Vahid Siyahısının hazırlanmasında məqsəd siyasi motivlərlə həbs olunmuş şəxslər barədə ümumi ictimai mövqenin ortaya qoyulması, bununla da onların azad edilməsi üçün ölkə daxilində və beynəlxalq qurumlarda səyləri artırmaqdır.