Daha bir uşaq qızılcadan vəfat edib
![](https://www.az24saat.org/wp-content/uploads/2023/12/1701417783682-780x464.jpg)
Sabirabadda 1 yaşlı uşaq qızılca xəstəliyindən həyatını itirib.
Toplum TV xəbər verir ki, bu barədə noyabrın 30-da TƏBİB məlumat yayıb.
Bildirilir ki, 2022-ci il təvəllüdlü azyaşlı noyabrın 30-da saat 12:47 radələrində Sabirabad Rayon Mərkəzi Xəstəxanasının Təcili tibbi yardım şöbəsinə yerləşdirilib.
Ona qızılcanın ağırlaşmış forması, neyrotoksikoz, ensefalit, kəskin tənəffüs, ürək-damar çatışmazlığı (III dərəcə) diaqnozları qoyulub.
“Pasiyentin yanaşı diaqnozu qavrama zəifliyi olub. Azyaşlı Reanimasiya şöbəsinə yerləşdirilib. Həkimlərin səylərinə baxmayaraq, azyaşlı dekabrın 1-də saat 00:15 radələrində vəfat edib”, – məlumatda qeyd olunub.
TƏBİB-in məlumatına görə, azyaşlı doğum evində hepatit və vərəm əleyhinə peyvənd olunub. Amma valideynlər digər peyvəndlərdən imtina ərizəsi yazıblar.
Bundan əvvəl, noyabrın 30-da Qaradağ rayonunda yerləşən 195 saylı orta məktəbdə 10 yaşlı şagirdin qızılca xəstəliyindən vəfat etdiyi bildirilmişdi. Ümudünya Səhiyyə Təşkilatının Azərbaycandakı nümayəndəliyi əhalini qızılcaya qarşı peyvənd olunmağa çağırıb.