Ombudsman Aparatının nümayəndələri jurnalistlə görüşüb

Həbsdə olan araşdırmaçı jurnalist Hafiz Babalı Ombudsmanın nümayəndələri ilə görüşüb.

Görüş mayın 2-də baş tutub. Hafiz Babalının yaxınlarının məlumatına görə, o, görüşdə həbsinin siyasi sifariş olduğunu, jurnalist fəaliyyətini uzun müddət əngəlləmək məqsədi daşıdığını bildirib.

Saytların yığılması

Həmçinin əlavə edib ki, saxlanıldığı dekabrın 13-dən bəri barəsində hər hansı istintaq hərəkəti aparılmayıb.

Jurnalist vurğulayıb ki, Cinayət Məcəlləsinin 32, 33 və 34-cü maddələrinin şərhinə dair Konstitusiya Məhkəməsinin qərarının mahiyyətinə görə, ittihamın ziddinə olaraq o, əlbir olan bir qrupun üzvü sayıla bilməz.

Hafiz Babalı həmçinin səhhətindəki ciddi problemlərə operativ tibbi müdaxilənin zəruri olduğunu bildirib. Bunun müvafiq instansiyaların nəzərinə çatdırılmasını istəyib.

Ombudsman Aparatının nümayəndələri Hafiz Babalının dediklərini dinləyib, bu məsələləri araşdıracaqlarını vəd ediblər.

Jurnalist Hafiz Babalı dekabrın 13-də saxlanılıb. Ona qarşı “xarici valyuta qaçaqmalçılığı” ittihamı irəli sürülüb. Məhkəmənin qərarı ilə o, üç ay müddətinə ilkin həbs cəzasına məhkum edilib.

Hafiz Babalı “AbzasMedia” işi üzrə cəlb edilib. Hüquq müdafiəçiləri Hafiz Babalını siyasi məhbus kimi tanıyıblar.

Ötən il noyabrın 20-də “AbzasMedia”nın direktoru Ülvi Həsənli, onun müavini Məhəmməd Kekalov, noyabrın 21-də saytın baş redaktoru Sevinc Vaqifqızı, noyabrın 30-da reportyor Nərgiz Absalamova, dekabrın 13-də araşdırmaçı jurnalist Hafiz Babalı, yanvarın 13-də isə jurnalist Elnarə Qasımova saxlanılıb.

Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb, barələrində həbs qətimkan tədbiri seçilib. Məhkəmə istintaq zamanı prokurorluğun ittihamlarını qəbul etsə jurnalistləri 8 ilədək həbs cəzası gözləyir.

Jurnalistlər ittihamları rədd edir, həbslərini “AbzasMedia”da hökumət rəsmiləri ilə bağlı dərc olunan korrupsiya araşdırmaları ilə əlaqələndirirlər.

Fevralın 24-dən başlayaraq “AbzasMedia” işi üzrə həbs edilən bütün jurnalistlərin həbs müddətləri daha 3 ay artırılıb.

Beynəlxalq təşkilatlar bu qərarları istintaqın əsassız aparılması ilə əlaqələndirib, jurnalistlər üzərində təzyiq olduğunu bildiriblər.