Maaş cədvəlinə qol çəkənlərin sayı artıb – Rəsmi
Onlar, əsasən, «Azərsu» və «Azəravtoyol» ASC-lərdə, eləcə də mənzil-kommunal təsərrüfatı idarələrində çalışanlardır
Bu ilin iyununda iqtisadiyyatda muzdla çalışan işçilərin – maaş cədvəlinə qol çəkənlərin sayı kəskin artıb. Dövlət Statistika Komitəsinin (DSK-nın) məlumatına görə, bir ayın içində işə düzələnlərin sayı 19 min 400 nəfər artaraq, iyulun əvvəlinə 1 milyon 521 min 100 nəfərə çatıb.
Bu, 1995-ci ildən bu yana ən yüksək göstərici sayıla bilər. O vaxt ölkədə muzdla çalışanların sayı 1 milyon 572 min nəfər olub. 2000-ci ildə – iri sənaye müəssisələrinin fəaliyyəti dayandığından, onların sayı kəskin azalaraq, 1 milyon 217 minə düşmüşdü.
İlin əvvəlindən bəri təkçə özəl bölmədə 20 min nəfər özünə iş tapıb. İyulun 1-nə özəl bölmədə çalışanların sayı 631 min 400 nəfər idi. İl başlarkən həmin göstərici 618 min 400 nəfərə bərabər olub.
DSK-nın məlumatından o da aydın olur ki, ilk yarımildə dövlət müəssisə və təşkilatlarında işləyənlərin də sayı 12 min 300 nəfər çoxalıb. «Azərsu» və «Azəravtoyol» ASC-lər, mənzil-kommunal təsərrüfatı idarələri xeyli sayda işçi qəbul edib.
