Musavat.com xəbər verir ki, bu sözləri “Qarabağ”ın baş məşqçisi Qurban Qurbanov deyib.

Xəbər verdiyimiz kimi, UEFA Avropa Liqasının qrup mərhələsi çərçivəsində “Fiorentina”nı qəbul edən Ağdam klubu meydandan 1:2 hesablı məğlubiyyətlə ayrılıb.

Matçdan sonra keçirilən mətbuat konfransında Qurbanov məğlubiyyəti belə şərh edib: “Məğlub olsaq da, qalib gəlmək üçün çox çalışdıq. “Fiorentina”ya qarşı oynamaq asan deyildi. Futbolçuları topla çox yaxşı davranırlar. Sadə qollar buraxdıq. Amma düşünürəm ki, “Fiorentina”ya qarşı layiqli oyun göstərdik. Bəzən biz də rəqibi topsuz qoyurduq və bu onlara çətinlik yaradırdı. Bu cür havada bizi dəstəkləməyə gələn azarkeşlərə minnətdaram. Sona qədər bizlə oldular. Onları məyus etmək istəməzdik. Rəqibə də uğurlar arzulayıram. İtaliyanın tam fərqli komandasıdır. Onların oyununa baxmaq hər birimiz üçün maraqlıdır. Mən də Avroliqada “Fiorentina”ya azarkeşlik edib, onların oyununa baxacağam”.

– O səviyyəyə gəlib çatmaq üçün çempionatımızın səviyyəsini qaldırmaq lazımdır. Bir komanda ilə iş düzəlmir, gərək bütün komandalarda bu proses getsin. İtaliya və digər Avropa ölkələrinin yüz illərlə təcrübəsi var. Biz bu gün daha yaxşı transferlər etsək də, ondan da yaxşılarını digərləri edir. Amma daha da irəli getmək istəyiriksə, transferlərimizin keyfiyyəti daha yuxarı olmalıdır. Öz oyunçularımdan razı qaldım. Belə oyunlarımızın sayı daha çox olsa, onların təcrübəsi, bacarığı daha keyfiyyətli olacaq. Bugünkü durum belədir ki, şikayətlənməli deyilik. Yenə növbəti mərhələyə çıxmağa şansımız var idi. Görünür, yenə hardasa səhv etmişik, daha diqqətli olmalıydıq.

 – Limitdən şikayət etmək düzgün olmaz. Son 3 ildə birində “İnter”ə, indi də “Fiorentina”ya qarşı oynadıq. Desəm ki, limiti dəyişmək lazımdır, elə çıxar ki, sanki mən işimi düz görürəm, başqaları düz görmür, yəni, düz çıxmaz. Hər bir ölkə futbolun inkişafı üçün müxtəlif variantlara əl atırlar. Legioner limiti də gənclərimizin inkişafına yönəlib, istər-istəməz hər hansı çatışmazlıqlarımız var. Komandanı, ölkə futbolunu stabil səviyyəyə çatdırmaq üçün komandaların sayını artırmaq lazımdır. Getdikcə oyunçularımızın ustalıq səviyyəsi daha da yaxşılaşmalıdır. Belə baxanda, “Beşiktaş”ın o cür şansı var idi. Amma sonra elə məğlubiyyətlə qrupdan çıxa bilmədilər. Yəni təkcə limitlə bağlı deyil. Mən desəm ki, limitə görə növbəti mərhələyə çıxa bilmədik, yalançı olaram. O ki qaldı çempionata adaptasiyaya, hər bir futbolçu üçün üzücü olacaq. Bunu soyunub-geyinmə otağında da gördüm. Onlar həm fizik olaraq yoruldular, həm də psixoloji zərbə aldılar. Bu bizim işimizdir, çalışacağıq ki, çempionata köklənək.

– Bəli, hesabı bilirdim və bu bizə təsir edirdi. Dünən də demişdim ki, oyunun gedişatında PAOK – “Slovan” matçının nəticəsi ilə maraqlanacağıq.

– Biz onları məğlub etmişdik, amma PAOK növbəti mərhələyə çıxdı. Deməli onlar daha layiq idilər.