Dövlət Departamenti tərəfləri sülhə çağırır

ABŞ Azərbaycan və Ermənistan rəhbərliyini hamının hüquqlarına hörməti təmin edəcək layiqli və möhkəm sülh əldə etməyə çağırıb.

Oktyabrın 16-da ABŞ Dövlət Departamentinin rəsmisi “Turan”ın müxbirinin İlham Əliyevin Xankəndidə Azərbaycan bayrağı qaldırması ilə bağlı sualına cavabında bu barədə danışıb.

Saytların yığılması

Departament rəsmisi deyib ki, Azərbaycan və Ermənistan arasında hələ də həllini tapmamış siyasi, iqtisadi, humanitar və təhlükəsizlik problemləri var:

“Güc tətbiqi qəbuledilməzdir və uzanan münaqişənin həlli üçün birbaşa dialoq zəruridir”.

“Köçkünlərin Ermənistanda sığınacaq və rahatlıq tapmasına kömək etmək üçün humanitar təşkilatlarla sıx əlaqəli şəkildə Yerevanın səylərini dəstəkləməyə davam edirik. Köçkünlərin yaşadıqları şoku və travmanı və qarşılaşdıqları qeyri-müəyyənlikləri başa düşürük”, – deyə Departament nümayəndəsi qeyd edib.

Sentyabrın 15-də Prezident İlham Əliyev Xankəndidə çıxışında deyib ki, Azərbaycan istədiyinə nail olub:

“Azərbaycan xalqının böyük əksəriyyəti o vaxt da – noyabrın 10-da və ondan sonrakı dövrdə çox yaxşı başa düşürdü ki, biz istədiyimizə nail olacağıq. İstədiyimiz isə bax, burada dalğalanan Azərbaycan Bayrağıdır”

Qarabağda son əməliyyatlar

Azərbaycan Müdafiə Nazirliyi sentyabrın 19-da Qarabağda lokal hərbi əməliyyatlara başladığını açıqlayıb.

Qurumun yaydığı rəsmi məlumatda deyilir ki, buna səbəb törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazidən çıxarılması, onların hərbi infrastrukturunun zərərsizləşdirilməsidir.

Əməliyyatlar sentyabrın 19-da səhərə yaxın saat 4:30 radələrində Xocavəndin Tağaverd kəndi ərazisində yeni inşa olunan tunel yolunda polis əməkdaşlarının olduğu “Kamaz”ın minaya düşməsi və nəticədə 4 polisin, həmçinin “Azərbaycan Avtomobil Yolları” Dövlət Agentliyinin iki əməkdaşının hadisə yerində həlak olması ilə əsaslandırılır.

Sentyabrın 28-də separatçı “Dağlıq Qarabağın (Artsax) Prezidenti” Samvel Şahramanyan “respublika”nın buraxılması barədə fərman imzalayıb.

O, fərmanı 19 sentyabr 2023-cü ildən sonra yaranmış vəziyyətlə əlaqələndirib.

Separatçı respublika nə vaxt yaranıb?

1991-ci il dekabrın 10-da azərbaycanlıların boykot etdiyi və yalnız ermənilərin qatıldığı referendum keçirilib.

Referendumun nəticəsinə görə, 6 yanvar 1992-ci ildə “Dağlıq Qarabağ Respublikası” rəsmən elan olunub. Lakin Ermənistan da daxil olmaqla, heç bir ölkə və ya beynəlxalq qurum rejimin müstəqilliyini tanımayıb.

Dağlıq Qarabağ və digər işğal edilmiş ərazilər BMT-də daxil olmaqla, bütün dünya dövlətləri tərəfindən Azərbaycanın suveren ərazisi kimi tanınıb.

İkinci Qarabağ münaqişənin qısa xronikası

2020-ci ilin sentyabrında Azərbaycan və Ermənistan silahlı qüvvələri arasında baş vermiş 44 günlük İkinci Qarabağ müharibəsi nəticəsində isə Azərbaycan Qarabağın bir hissəsinə və ətraf 7 rayona nəzarəti bərpa edib.

Azərbaycan, Ermənistan və Rusiya rəhbərliyinin imzaladığı üçtərəfli birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

Tərəflər arasında indiyə kimi sülh sazişi imzalanmayıb.

Azərbaycan Xankəndi və digər ərazilərdə qanunsuz erməni silahlı birləşmələrinin olduğunu iddia edirdi.