ABŞ Bakı və Yerevanı tezliklə sülh sazişi bağlamağa çağırıb
Birləşmiş Ştatlar Ermənistan və Azərbaycan arasında sülhsevər addımları alqışlayır və tərəfləri tezliklə sülh sazişi əldə etməyə çağırır.
Toplum TV xəbər verir ki, bunu yanvarın 18-də ABŞ Dövlət Departamentinin sözçüsü Metyu Miller “Turan” xəbər agentliyinin sülh prosesinin hazırkı vəziyyəti haqqında sualını cavablandıran zaman bildirib.
“Biz hər iki ölkənin suverenliyini və ərazi bütövlüyünü dəstəkləyirik. Ümid edirik ki, onlar bir-birinin suverenliyini və ərazi bütövlüyünü tanıyan davamlı sülh müqaviləsi imzalayacaqlar və bu nə qədər tez olsa, bir o qədər yaxşıdır”, – Miler açıqlamasında vurğulayıb.
Onun sözlərinə görə, son bir il ərzində tərəflər əhəmiyyətli irəliləyiş əldə ediblər:
“Biz onları əvvəlki danışıqlara əsaslanaraq bu sürəti qoruyub saxlamağa təşviq edirik və sülh sazişi imzlamağa çağırırıg”.
Bununla belə, Miller Dövlət Departamentin Qafqaz danışıqları üzrə baş müşaviri Lui Bononun Ermənistana son səfəri və ordakı görüşlərinin təfərrüatlarını açıqlamaqdan çəkinib.