Azərbaycan istehsalı minatəmizləmə texnikası Ukraynada fəaliyyətə başlayıb
Azərbaycan istehsalı minatəmizləmə texnikası Ukraynada minatəmizləmə işlərinə cəlb edilib.
Toplum TV APA-ya istinadən xəbər verir ki, bunu noyabrın 28-də jurnalistlərə açıqlamasında Minatəmizləmə Agentliyinin (ANAMA) İdarə Heyətinin sədri Vüqar Süleymanov deyib.
Onun sözlərinə görə, Azərbaycanda minatəmizləmə işlərində qısa müddətə yerli istehsal olan texnikalardan istifadə olunub.
O bildirib ki, iki cür minatəmizləmə maşınları minaaxtarma işlərinə cəlb olunub.
“Hazırda ərazidə bu maşınlar çalışır. Qeyd edim ki, artıq bir yerli minatəmizləmə texnikası da Ukraynada minatəmizləmə işlərinə cəlb edilib”, – deyə rəsmi bildirib.
ANAMA rəhbəri açıqlamasında həmçinin qeyd edib ki, Azərbaycanda minatəmizləmə işlərinə siçovullar cəlb olunub.
Onun sözlərinə görə, siçovullar hazırda Ağdam rayonunda olan minalı sahələrdədir:
“Siçovulları mina axtaran itlərlə müqayisə eləsək, üstün cəhətləri də var, itdən zəif cəhətləri də mövcuddur. Onların iş vaxtı itlərin iş vaxtından azdır. Hazırda siçovulların fəaliyyəti effektivdir”.