Azərbaycanda bələdiyyə sədrlərinə cinayət işi açılıb
Azərbaycanda bir neçə bələdiyyə sədri barəsində cinayət işi başlanılıb.
Toplum TV xəbər verir ki, bu barədə Bələdiyyələrin fəaliyyətinə inzibati nəzarəti həyata keçirən orqanın illik məruzəsində qeyd olunub.
Bildirilib ki, keçən il bələdiyyələrlə bağlı aparılan araşdırmalar zamanı aşkar edilən qanun pozuntuları üzrə 30 halda toplanmış materiallar hüquqi qiymət verilməsi üçün aidiyyəti istintaq orqanlarına göndərilib. Onlardan 15-i üzrə artıq cinayət işi başlanıb.
Belə ki, Ağcabədi rayonu Rəncbərlər bələdiyyəsi sədri, Şabran rayonu Rəhimli bələdiyyəsinin sədri, Daşkəsən rayonu Əhmədli bələdiyyəsi sədri, Gədəbəy rayonu Qoşabulaq bələdiyyəsinin sədri, Abşeron rayonu Masazır bələdiyyəsinin sabiq sədri və Binəqədi rayonu Binəqədi qəsəbə bələdiyyəsinin qulluqçusu barəsində cinayət işi açılıb.
Onlar barəsində qanunsuz torpaq sahəsi satmaq, büdcə vəsaitlərinin mənimsənilməsi, vəzifə səlahiyyətlərindən sui-istifadə etmək və s. maddələrlə ittihamlar irəli sürülüb.