Ehtiyatda olan hərbçilərin psixoloji reabilitasiyası ilə bağlı mərkəzlərin yaradılması təklif olunub
Ehtiyatda olan hərbçilərin psixoloji reabilitasiyası ilə bağlı mərkəzlərin yaradılması təklif olunub.
“Report” xəbər verir ki, bu təkliflə Milli Məclisin Əmək və sosial siyasət komitəsinin sədri Musa Quliyev “Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası” layihəsinin aralıq nəticələrinin təqdimat mərasimində çıxış edib.
O bildirib ki, tərxis olunan hərbçilərin psixoloji reabilitasiyası ilə bağlı Müdafiə Nazirliyinin nəzdində mərkəzlərin yaradılması lazımdır: “Bu məsələ ilə bağlı Milli Məclis olaraq dəstək olmağa hazırıq”.
M.Quliyev əlavə edib ki, yardım göstərə bilən, savadlı psixoloqların sayı az olduqca, onların yerini falçılar və ektrasenslər doldurur: “Bu problemin həlli ilə kompleks məşğul olmaq lazımdır. Bu iş təkcə həkim və psixoloqların üzərinə düşməməlidir. Ona görə də mütəmadi olaraq maarifləndirici tədbirlər həyata keçirilməlidir”.
Mənbə:Report
