Gerasimov Moskvanın Yerevanla Bakı arasındakı vasitəçilik səylərindən danışıb
Rusiya Silahlı Qüvvələrinin Baş Qərargah rəisi, ordu generalı Valeri Gerasimov bildirib ki, Moskva Yerevanla Bakı arasında ən kəskin ziddiyyətlərin aradan qaldırılması və sülh müqaviləsinin bağlanması istiqamətində fəaliyyətini davam etdirir.
Toplum TV xəbər verir ki, Gerasimov bu barədə dekabrın 21-də xarici hərbi attaşelər üçün brifinqdə çıxış edən zaman bildirib.
Onun sözlərinə görə, Rusiya Cənubi Qafqazda nəqliyyat kommunikasiyalarının açılması, Bakı ilə İrəvan arasında sülh müqaviləsinin bağlanması, eləcə də Ermənistanla Azərbaycan arasında ən kəskin ziddiyyətlərin həlli istiqamətində məqsədyönlü iş aparır.
“Cənubi Qafqazda vəziyyət gərgin olaraq qalır, lakin sabitləşməyə meyllidir”, – Gerasimov bildirib.
Onun sözlərinə görə, Rusiya hərbi kontingenti Qarabağda da tapşırıqları yerinə yetirməkdə davam edir.
