İlham Əliyev Rusiya Hökuməti sədrinin müavini ilə görüşüb
Azərbaycan Prezidenti İlham Əliyev bu gün Rusiya Federasiyası Hökuməti sədrinin müavini, Hökumətlərarası Komissiyanın həmsədri Aleksey Overçuku qəbul edib.
Toplum TV xəbər verir ki, bu barədə yanvarın 23-də Prezidentin Mətbuat Xidməti məlumat yayıb.
Bildirilir ki, görüşdə nəqliyyat-logistika, Şimal-Cənub Nəqliyyat Dəhlizinin təşviqi ilə bağlı məsələlər ətrafında fikir mübadiləsi aparılıb.
Söhbət zamanı iqtisadi əməkdaşlığın geniş gündəliyə malik olduğu vurğulanaraq, qarşıda bu sahədə yeni istiqamətlər üzrə planların nəzərdə tutulduğu bildirilib.
İki ölkə arasında ticarət dövriyyəsinin 17,5 faiz, həmçinin yük və tranzit daşımalarının davamlı artımı əməkdaşlığın yaxşı göstəricisi kimi qiymətləndirilib.
Həmçinin görüşdə Azərbaycan-Rusiya əməkdaşlığının inkişafının əsas istiqamətləri üzrə 2024-2026-cı illər üçün Yol Xəritəsinin imzalanmasının əhəmiyyəti vurğulanıb. Aleksey Overçukun səfərinin isə əlaqələrin genişləndirilməsi işinə xidmət edəcəyinə əminlik ifadə edilib.