Mərkəzi Seçki Komissiyasının rəhbəri jurnalistləri seçkilərdəki çatışmazlıqları işıqlandırmaqdan “çəkinməməyə” çağırıb
Seçki prosesi milyonlarla insanı əhatə etdiyi üçün müəyyən xırda çatışmazlıqlar ola bilər. Bunu fevralın 7-də seçkilərin başlaması ilə əlaqədar keçirilən brifinqdə Mərkəzi Seçki Komissiyasının sədri Məzahir Pənahov bildirib.
O, jurnalistlərə müraciət edərək məntəqələrdə qarşılaşdıqları hər hansı problemi işıqlandırmaqdan çəkinməməyə çağırıb. “Əksinə, biz bunu təqdir edəcəyik. Eləcə də, beynəlxalq və yerli müşahidəçilər də yerlərdə fəal olmalıdırlar”, – o deyib.
Pənahov deyib ki, Mərkəzi Seçki Komissiyasının işi seçicinin konstitusion hüququnu təmin etməkdir. Bu baxımdan heç kim seçicinin iradəsinə təsir göstərə, seçki məntəqələrində fəaliyyət göstərən komissiyanın üzvlərinin işinə maneə törədə bilməz. Çünki onlar da seçki prosesinin şəffaf aparılması üçün çalışırlar.
“Seçki Məcəlləsinin tələblərini pozan istənilən hərəkət qarşısında ciddi addımlar atılacaq”, – Məzahir Pənahov qeyd edib.
