Moskva Minski ‘üstüörtülü’ hədələyib
Moskva Belarusda silahlı əsgərlər tərəfindən həbs edilmiş 33 rusiyalı muzdlunun hələ də saxlanması ilə bağlı Minski üstüörtülü şəkildə hədələyib.
Rusiya Təhlükəsizlik Şurası sədrinin müavini, keçmiş baş nazir Dmitry Medvedev avqustun 5-də deyib ki, bu insidentin ikitərəfli münasibətlər üçün çox ağır nəticələri ola bilər.
Medvedevin bu bəyanatı Belarusda Alyaksandr Lukashenka üçün həlledici əhəmiyyəti olan prezident seçkisinin ərəfəsinə təsadüf edir.
Bu seçkidə namizədliyini 6-cı dəfə irəli sürmüş Lukashenka hakimiyyətini nəyin bahasına olursa olsun uzatmağa çalışır.
“Xırda pul” söhbəti
Medvedev deyib ki, Belarus rəhbərliyi ikitərəfli bağları “seçki kampaniyasında xırda pula” qurban verib:
“Bu nəinki təhqiramizdir, hətta çox kədərlidir. Və bunun çox ağır nəticələri olacaq”.
Muzdluların həbsi və onların Belarusda olması 9 avqust seçkisindən əvvəl Moskva və Minsk arasında gərginliyi son həddinə çatdırıb.
Lukashenka hazırda 26 illik prezidentliyinin ən çətin sınağı ilə üzləşib.
Ölkədə minlərlə vətəndaş bu seçkidə Lukashenka-ya rəqib namizədi dəstəkləmək üçün izdihamlı mitinqlərə çıxır.
Belarus hakimiyyət orqanları həbs edilmiş Rusiya muzdlularını iğtişaşlar törətmək cəhdində ittiham edir.
“Rəngli inqilab” ittihamı
Rusiya muzdluların dərhal buraxılmasını tələb edir və bildirir ki, bu adamlar Belarusa yalnız tranzit məntəqəsi kimi gəlmişdilər, amma təyyarələrinə gecikdiklərindən orada qalıblar.
Avqustun 4-də etdiyi çıxışında Lukashenka Rusiyalı muzdlu əsgərləri Belarusda “rəngli inqilab” yaratmaq cəhdində ittiham edib.
Belarusda saxlanmış rusiyalıların Kremlə bağlı oliqarx Yevgeny Prigozhin-in Vagner özəl hərbi şirkətinin muzdlu döyüşçüləri olduğuna inanılır.
Prigozhin 2016-cı il ABŞ seçkisinə müdaxilədə ittiham edilir və Vaşinqtonun sanksiya sihayhısına salınıb.
24saat.org
Mənbə – azadliq.info
