Azərbaycan müxalifətinin tanınmış simalarından olan Tofiq Yaqublu, 40 gün davam edən aclıq aksiyasına son qoyub. Bu barədə onun qızı Nigar Həzi sosial şəbəkədə paylaşım edib.
“Onu bu vəziyyətdə görmək dəhşətli idi”
Nigar Həzi atasının səhhətinin kritik həddə çatdığını vurğulayıb:
“Onun yanına gedəndə nəfəsim kəsildi. Dərhal aclığı dayandırması üçün yalvardım. Bu vəziyyət təkcə onun yox, mənim və körpəmin həyatına da təhlükə idi.”
Həkim nəzarətindədir
Tofiq Yaqublunun müalicəsi hazırda Ədliyyə Nazirliyinin Penitensiar Xidmətin Müalicə Müəssisəsində davam etdirilir. Onun yanında hazırda tanınmış həkim Adil Qeybulla da var.
Niə aclıq aksiyası keçirmişdi?
2023-cü ilin dekabrında həbs olunan Tofiq Yaqubluya qarşı dələduzluq və saxta sənəd hazırlama ittihamları irəli sürülmüş və 2024-cü ilin martında 9 il azadlıqdan məhrum edilmişdi. Buna etiraz olaraq siyasətçi aprelin 1-dən etibarən ölüm aclığına başlamışdı.
Bu onun ilk aclıq aksiyası deyil
Tofiq Yaqublu daha əvvəl də – 2020-ci ildə – 17 günlük aclıq aksiyası keçirmiş və bu aksiyanın nəticəsində 4 il 3 aylıq həbs cəzası şərti cəza ilə əvəz olunmuşdu.
Yaqublu: Hökumətin sərt tənqidçisi
Müxalif Müsavat Partiyası və Milli Şuranın üzvü olan Tofiq Yaqublu, son 32 ildir Azərbaycanda hakimiyyətdə olan Əliyevlər ailəsinin sərt tənqidçilərindən biri kimi tanınır.