Sürücü Cəbrayılda minaya düşüb
Noyabrın 2-si Cəbrayıl rayonunun işğaldan azad olunmuş ərazisində 1972-ci il təvəllüdlü İlqar Əhmədovun minaya düşdüyü bildirilir.
Bu barədə Cəbrayıl rayon Prokurorluğu məlumat yayıb.
Məlumata görə, ilkin araşdırmalarla təmir-tikinti işləri ilə məşğul olan şirkətin sürücüsü İ.Əhmədovun rayonun Mehdili kəndi ərazisində piyada əleyhinə minaya düşməsi nəticəsində müxtəlif dərəcəli bədən xəsarətləri alması müəyyən edilib.
Hazırda faktla bağlı Cəbrayıl rayon Prokurorluğunda araşdırma aparılır.
Azərbaycan rəsmiləri deyirlər ki, 2020-ci il noyabrın 10-da üçtərəfli bəyanatın imzalanmasından sonra işğaldan azad edilən ərazilərdə 260-dan çox şəxs minaya düşüb. Onların 45-nin həlak olduğu bildirilir.
Azərbaycan rəsmiləri Ermənistan tərəfini minalanmış ərazilərin xəritələrini onlara verməməkdə günahlandırır. Amma son illər Azərbaycanda tutulan Ermənistan hərbçilərindən bir neçə qrupunun təhvil verilməsi əvəzi azad olunan bir sıra rayonlara aid mina xəritələrinin alındığı açıqlanmışdı. Sonradan da Azərbaycan prezidenti həmin xəritələrin reallığı böyük ölçüdə əks etdirməməsi ilə bağlı narazılığını ifadə edib.
Buna cavab olaraq Ermənistan Baş naziri Nikol Paşinyan bildirib ki, onlar xəritələrin yaxşısını siyirmədə saxlayıb, pis keyfiyyətdə olanı verməyiblər. “Daima bu prosesi müxtəlif mövzularda alver predmetinə çevirməyə cəhdlər olunur…”, – o, əlavə edib ki,
2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona (Cəbrayıl rayonu daxil) nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
