Hikmət Hacızadə: “Azərbaycanın həm neytrallığı, həm də coğrafiyası nəzərə alınıb”
Məlum olduğu kimi, bu gün Bakıda Rusiya Silahlı Qüvvələrinin Baş Qərargah rəisi Valeri Gerasimovla ABŞ Silahlı Qüvvələrinin qərargah rəisləri komitəsinin sədri Cozef Danford arasında görüşün keçirilməsi planlaşdırılır. Hansı ki, bu görüşün başqa bir ölkədə deyil, məhz Azərbaycanda reallaşması fərqli mülahizələrə səbəb olamqdadır. Belə ki, əksər siyasilər hesab edir ki, bu görüşün ölkəmizdə gerçəkləşməsi həm ABŞ-ın, həm də Rusiyanın Azərbaycana verdiyi dəyərlə bağlıdır.
Maraqlıdır, doğrudanmı iki nəhəng dövlətin ordu rəhbərlərinin ölkəmizdə görüşü Azərbaycana verilən əlahiddə diqqətin nəticəsidir? Bunu Azəbaycana yönəlik xüsusi bir etimad kimi dəyərləndirmək mümkündürmü?
24saat.org-a açıqlama verən politoloq Hikmət Hacızadə bu görüşü Azərbaycana olan diqqətin nümunəsi kimi dəyərləndirməyin zəruri olduğunu vurğuladı:
“Əlbəttə ki, diqqət var. Burada həm Azərbaycanın neytrallığı, həm coğrafiyası vacib rol oynayır. Buna görə də Azərbaycana diqqətin olması ilə bağlı deyilənlərlə razılaşmaya bilmərik. Onlar bura kurorta gəlməyiblər. Baş verən görüşün məhz Azərbaycanda keçirilməsini ölkəmizə olan münasibətin göstəricisi kimi dəyərləndirilə bilər. Bu, birmənalıdır”.
Seymur Əliyev
