Çovdarovun cinayət işində zərərçəkən şəxs yol qəzasında öldü
O, məhkəmədə ifadə verəndən bir gün sonra baş verən qəzada 3 nəfər həlak olub
Ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işində zərərçəkmiş olan şəxs yol qəzasında həlak olub. Hadisə aprelin 14-də Zığ-Aeroport yolunda baş verib. Bakı şəhər sakini Sadiq Edilov idarə etdiyi “Kia” markalı avtomobili qarşıda gedən paytaxt sakini Gülağa Quliyevin idarə etdiyi “VAZ-2104” markalı avtomobilə vurub və “VAZ” markalı avtomobildə yanğın baş verib. Nəticədə G. Quliyev və sərnişinləri, paytaxt sakinləri – Narif Sadıxovla qardaşı Elçin hadisə yerində ölüblər.
Hazırda faktla bağlı araşdırma aparılır.
Qeyd edək ki, dünyasını dəyişn Quliyev Gülağa Məhərrəm oğlu digər zərərçəkmiş Namiq Orucovun sürücüsü olub. O, hadisədən 1 gün əvvəl məhkəmədə ifadə verib. Bildirib ki, 2015-ci ildə Namiq Orucovu İlham Qasımovun bacısı oğlunun toyuna aparıb. Orda söz-söhbət düşdüyünü və saxlanıldığını, daha sonra isə günahsız yerə tutulduğunun məlum olduğunu və sərbəst buraxıldığını deyib.