Ekspertdən Ziyafət Əsgərova məsləhət:”Dövlət adamı olmaq ciddilik tələb edir, ölkəni multfilmə çevirməyin…”
Milli Məclisinin sədrinin birinci müavini Ziyafət Əsgərovun “İqtisadi təhlükəsizlik: ticarətin asanlaşdırılması və mühafizəsi aspektləri” adlı elmi-praktiki konfransda səsləndirdiyi fikirlər birmənalı qarşılanmayıb. O bildiirb ki, Azərbaycan ötən ili yüksək göstəricilərlə başa vurub: “Dünyada iqtisadi böhran davam edir. Bunun mənfi nəticələri Azərbaycana az da olsa təsir etdi. Amma ölkəmiz bu böhrandan çıxa bildi”.
24.saat.org bildirir ki, millət vəkilinin açıqlamasına öz facebook səhifəsində iqtisadçı-ekspert Natiq Cəfərli də münasibət bildirib:
“Günün 2 iqtisadi xəbəri: 1) Ziyafət Əsgərov: Bilirsiniz ki, dünyada iqtisadi-ticari böhran hələ də davam edir. Azərbaycan bu böhrandan demək olar ki yan keçdi, 2016-cı ili çox yüksək göstəricilərlə başa vurduq, 2) Bank rəhbərləri Mərkəzi Banka toplaşdı – Manat “tam üzən məzənnəyə” keçir.
Hörmətli Ziyafət müəllim, sırf rəsmi rəqəmlərə baxaq, 2016-cı ildə: 1) Ölkədə ÜDM 3,9% azaldı, bu MDB-də ən pis, dünyada isə pis nəticələrdən biridir, 2) Qeyri-neft ÜDM-i 5,4% azalıb, 3) Rəsmi inflyasiya 12%-i keçib, 4) İnsanların real gəlirləri azalıb, 5) Xarici ticarət dövriyyəsi azalıb, 6) Qeyri-neft ixracı 28% azalıb, 7) İş yerlərinin qapanması sürətlənib – bir daha, bunlar rəsmi rəqəmlərdir, bəs biz necə bu böhrandan yan keçdik, hansı məntiqlə və rəqəmlərlə bu təsdiqi tapıb?!
Mərkəzi Bank artıq 15-ci dəfədir elan edir ki, “manat tam üzən məzənnəyə keçir”, bu qədər də qeyri-ciddilik olmaz axı! Mərkəzi Bank çox vacib, önəmli dövlət institutur, bu qurumun qeyri-ciddiliyi bütün iqtisadiyyata ağır zərbə vurur.
Cənablar, dövlət adamı olmaq ciddilik tələb edir, ölkəni multfilmə çevirməyin…”