Azərbaycanın Baş naziri Əli Əsədov Bakıda “2023-cü il “Qlobal Dayanıqlı İnkişaf Məqsədləri Sammitinin nəticələri və DİM-lərin həyata keçirilməsində ali audit qurumlarının rolu” mövzusunda keçirilən 3-cü DİM Dialoqunda iştirak edən ali audit qurumlarının rəhbər şəxslərlə görüşüb.

Saytların yığılması

Bu barədə “Report”a Nazirlər Kabinetindən məlumat verilib.

Ə.Əsədov 3-cü DİM Dialoqunun əhəmiyyətini vurğulayaraq onu Azərbaycanın DİM-lərə nail olunması istiqamətində əldə etdiyi irəliləyişlərlə tanış olmaq, həmçinin bu prosesin qiymətləndirilməsində ali audit qurumlarının rolunu nəzərdən keçirmək üçün yaxşı fürsət kimi dəyərləndirib.

Azərbaycan Hökumətinın BMT ilə əməkdaşlığa böyük önəm verdiyini deyən Baş nazir DİM üzrə öhdəliklərin həyata keçirilməsinin ölkəmizdə dövlət siyasətinin mühüm tərkib hissələrindən biri olduğunu deyib.

Diqqətə çatdırıb ki, DİM-lərin icrası ilə bağlı səmərəli milli icra mexanizminin formalaşdırılmasına ehtiyac olduğu nəzərə alınaraq 2016-cı ildə Azərbaycan Prezidenti Dayanıqlı İnkişaf üzrə Milli Əlaqələndirmə Şurası yaradıb.

Ötən dövrdə ölkəmizdə DİM-lərə nail olunması istiqamətində mühüm işlərin görüldüyünü deyən Ə.Əsədov Azərbaycanın DİM-lərin icrası üzrə BMT-nin Yüksək Səviyyəli Siyasi Forumuna 3 dəfə Könüllü Milli Hesabat təqdim edən regionda ilk və dünyada 10 ölkədən biri olduğunu bildirib.

Diqqətə çatdırılıb ki, Azərbaycan Hökuməti DİM-lərin həyata keçirilməsində, o cümlədən ayrılmış vəsaitlərin məqsədyönlü istifadəsi, həmçinin şəffaflıq və hesabatlılığın təmin edilməsində ali audit qurumlarının roluna böyük əhəmiyyət verir. Bu məsələ cari ilin mart ayında Milli Əlaqələndirmə Şurası tərəfindən qəbul edilmiş Fəaliyyət Planında öz əksini tapıb.

Bildirilib ki, Qoşulmama Hərəkatının COVID-19-a qarşı mübarizə üzrə Təmas Qrupunun bu ilin mart ayında Bakıda keçirilən Zirvə görüşündə Azərbaycan Prezidenti tərəfindən 18-ci Dayanıqlı İnkişaf Məqsədi təşəbbüsü irəli sürülüb. Mina təhlükəsi ilə mübarizəyə dair fəaliyyətləri özündə ehtiva edən bu DİM-in Azərbaycanın işğaldan azad olunmuş ərazilərində bərpa işlərinin aparılması və həmin ərazilərə təhlükəsiz qayıdışın təmin edilməsi baxımından əhəmiyyəti vurğulanıb.

Azərbaycanın mina və digər partlayıcı sursatlardan ən çox çirklənmiş ölkələrdən biri olduğu diqqətə çatdırılaraq İkinci Qarabağ müharibəsi başa çatandan sonra 300-dən çox hərbi və mülki vətəndaşımızın minadan həlak olduğu və ağır yaralandığı qeyd edilib.

Görüşdə DİM-lərin həyata keçirilməsində Ali Audit Qurumlarının rolu müzakirə olunub.

Mənbə:Report

Saytların yığılması