Loading...
Loading...
ÖLKƏDünya

NATO müttəfiqləri şərqi Avropaya yeni qüvvələr gətirir

Ümumilkdə tanklar və 5 minlik əsgəri qüvvənin vəzifəsi NATO-nun əsas ordusu gətirilənədək hər hansı təcavüzün qarşısını almaqdır

 

Almaniyanın 130 hərbçisi və 60 hərbi maşını fevralın 17-də Litvaya çatıb.

 

Bu, Rusiyanın Ukraynaya müdaxilə təhlükəsi ilə bağlı Almaniyadan Litvaya göndərilən hərbi qüvvələrin təxminən yarısıdır.

 

Litva prezidenti Gitanas Nauseda deyib ki, Almaniya kansleri Olof Şolts ona bu qoşunların lazım gələrsə Litvanın müdafiəsi üçün döyüşməyə hazır olduqlarını bildirib:

 

“Almaniya ordusu Litvaya, əgər təhlükə olarsa bizi müdafiə etmək üçün gəlib. Onlar öz vəzifələrini yerinə yetirməyə hazırdırlar”.

 

Reuters agentliyi polkovnik-leytenant Daniel Andreyə istinadən bildirir ki, 130 hərbçi artıq Litvada olan 350 nəfərlik Almaniya əsgəri qüvvəsini gücləndirməlidir:

 

“Biz isbat etdik ki, lazım gələrsə uzun məsafəyə qısa müddətdə böyük qüvvə gətirməyə hazırıq”.

 

Burada Almaniyanın habelə 100-dək hərbi texnikası var.

 

Şərq cinahı gücləndirilir

 

Reuters yazır ki, NATO Ukrayna ətrafında yaranmış böhranla bağlı özünün Rusiya ilə həmsərhəd şərq cinahını gücləndirir.

 

Artilleriya və kəşfiyyat maşınlarından və pantserqrenadyor xüsusi birləşmələrindən (motoatıcı) ibarət karvan Almaniyadan fevralın 15-də çıxıb.

 

Litva müdafiə nazirinin müavini Margiris Abukeviçus deyib ki, müttəfiqlərin Rusiyanı çəkindərəcək element kimi ölkə ərazisində olması çox mühümdür.

 

Almaniyanın başçılıq etdiyi bu hərbi birləşməyə qarşıdan gələn aylarda Norveçin 50-60 hərbçisi də qoşulacaq.

 

Hazırda Litvada üst-üstə 1610 NATO hərbçisi var.

 

Britaniya bildirib ki, Estoniyadakı hərbi qüvvələrinin sayını iki dəfə artıracaq.

 

Rusiya 2014-cü ildə Krımı ilhaq etdikdən sonra, NATO 2017-ci ildə Estoniya, Litva, Latviya və Polşada dörd beynəlmiləl döyüş qrupu yerləşdirib.

 

Ümumilkdə tanklar və 5 minlik əsgəri qüvvənin vəzifəsi NATO-nun əsas ordusu gətirilənədək hər hansı təcavüzün qarşısını almaqdır.

 

Yeni döyüş birləşmələri

 

Bu arada Almaniya hərbi hava qüvvələrinin Eurofighter qırıcıları fevralın 17-də Rumıniyanın şərqindəki hərbi hava bazasına gətirilib.

 

Reuters yazır ki, 3 Eurofighter qırıcısı və təxminən 60 əsgər buradakı İtaliya və Rumıniya birliklərinə qoşulacaq.

 

Bu qüvvələr Qara dəniz sahilindəki Mihail Kogalniceanu hərbi hava bazasında yerləşdirilib.

24 saat” “
NATO müttəfiqləri şərqi Avropaya yeni qüvvələr gətirir
” başlıqlı yazını “AzadliqRadiosu”na istinadən dərc edib

Xeberler

Gözdən qaçırmayın:  Kiyev ətrafına Rusiya hərbi konvoyunun cəmləndiyi bildirilir

This site uses Akismet to reduce spam. Learn how your comment data is processed.

Back to top button