Piyadaların üst-başını batıran sürücülər cərimələnəcək
Yağıntılı havalarda piyadaların üst-başını batıran sürücülər 40 manat cərimələnəcək.
Toplum TV xəbər verir ki, bu barədə yanvarın 11-də Baş Dövlət Yol Polisi İdarəsi məlumat yayıb.
“Yollardakı su gölməçələri piyadalar üçün böyük problemdir. Çünki bəzi sürücülər hava şəraitini nəzərə almır və yağıntılı havalarda yollardan keçərkən sürət həddini azaltmaq əvəzinə, əksinə, daha da artıraraq, yol kənarında dayanan piyadaları üst-başlarını batırırlar”, – məlumatda qeyd olunub.
Həmçinin bildirilib ki, İnzibati Xətalar Məcəlləsinin 42-ci maddəsinin 1.5 bəndində bu məsələnin həlli öz təsdiqini tapıb.
“Bununla bağlı sürücü məsuliyyətə cəlb olunmaqla, ona protokol tərtib edilir. Bütün sürücülərin nəzərinə çatdırırıq ki, bu qaydanı pozan hər kəsə 40 manat miqdarında cərimə tətbiq olunacaq”, – xəbərdarlıqda vurğulanıb.