Sexdəki yanğında xəsarət alanların bəzilərinin vəziyyəti ağırdır
Yanvarın 15-də Bakının Binəqədi rayonudakı mebel sexində baş verən partlayışla əlaqədar tibb müəssisələrində müalicə olunan 10 nəfərdən 9-nun vəziyyəti ağırdır.
Toplum TV xəbər verir ki, bu barədə yanvarın 19-da TƏBİB məlumat yayıb.
Bildirilib ki, hazırda Nərimanov Tibb Mərkəzinin nəzdində olan Yanıq Mərkəzində müalicə alan 9 nəfərdən 3-nün vəziyyəti ağır stabil, 6 nəfərin vəziyyəti isə orta ağır olaraq qalır.
Qeyd olunub ki, Kliniki Tibbi Mərkəzin müvafiq şöbələrində isə 1 nəfərin müalicəsi davam etdirilir, 2 nəfər ambulator müalicə üçün evə buraxılıb.
Xatırladaq ki, məlum hadisə nəticəsində 9 nəfərin meyiti dağıntılar altından çıxarılıb, 24 nəfər müxtəlif dərəcəli bədən xəsarətləri alıb. Partlayışla bağlı Cinayət Məcəlləsinin müvafiq maddələri ilə cinayət işi başlanıb.