“ABŞ-ın barmaqları çap maşınının üstündədir, lazım gəlsə…”
Zərdüşt Əlizadə: “Ağ Ev hələlik psixoloji müharibə aparır”
ABŞ-ın bu günlərdə daha iki təyyarə daşıyan gəmisini Şimali Koreyaya göndərməsi iki dövlət arasında müharibə ehtimalını yenidən gündəmə gətirib. Maraqlıdır, ABŞ Şimali Koreya ilə müharibəyə maliyyə və hərbi baxımdan yetərincə hazırdırmı?
Moderator.az-a açıqlama verən politoloq Zərdüşt Əlizadə ABŞ-ın maliyyə probleminin olmadığını vurğuladı:
“Amerikanın maliyyə baxımından heç bir müşkülü yoxdur. ABŞ-ın barmaqları çap maşınının üstündədir. Problem yaransa, bir anda bir neçə milyard dollar pul çap edib çıxardacaq.
Şimali Koreya ilə müharibənin Yaponiya, Cənubi Koreya və ABŞ-ın digər müttəfiqləri üçün fəsadları ola bilər. ABŞ da məcburdur ki, müttəfiqlərinin qayğılarını nəzərə alsın. Hesab edirəm ki, bu, hələlik psixoloji müharibədir. Bunun nə dərəcədə alınıb-alınmadığını isə zaman göstərəcək”.