Azərbaycan ordusunda itki: əsgərin özünü silahla vurduğu bildirilir
Yayımlandı: 11 Dekabr 2022 16:09
DSX: “Əsgər silahla davranış qaydalarını pozub”
Dövlət Sərhəd Xidmətinin (DSX) Sərhəd Qoşunlarının Qazax Əlahiddə Sərhəd Diviziyasının əsgəri Məhəmməd Əliyevin güllə yarasından öldüyü bildirilir.
Bu barədə DSX məlumat yayıb.
Bildirilir ki, hadisə dekabrın 10-da baş verib.
DSX 2003-cü il təvəllüdlü müddətli hərbi qulluqçu, əsgər Məhəmməd Məhərrəm oğlu Əliyevin silahla davranış qaydalarının pozulması nəticəsində vəfat etdiyini iddia edir.
“Baş vermiş hadisənin araşdırılması məqsədilə Dövlət Sərhəd Xidməti rəisinin göstərişi ilə Sərhəd Qoşunlarının komandanı hadisə yerinə ezam olunub”, – deyə DSX açıqlamasında qeyd edib.
Faktla bağlı prokurorluq orqanları ilə birgə araşdırma işlərinin aparıldığı bildirilir.
Vəfat edən əsgərin Beyləqanın Birinci Şahsevən kəndindən olduğu deyilir.
Meydan TV əsgərin ailəsi ilə əlaqə saxlaya bilməyib.
