Bəşər Əsəd rejimi İŞİD-i istiqamətləndirdiyini etiraf edib.

“Baas” partiyasının nəzarətində olan milli məclisin baş katibi Halid Abbud bu barədə açıqlama verib. Açıqlamaya əsasən, rejimin xüsusi xidmət orqanları İŞİD qruplaşmasının içinə sızıb və terrorçuları istiqamətləndirir.

Abbud üstüörtülü şəkildə rəsmi Ankaranı hədələyərək İŞİD-in Türkiyədəki terror aksiyalarının qarşısını ancaq rejimlə əməkdaşlıq edildiyi təqdirdə almaq mümkün olduğunu bildirib.

Halid deyib: “İŞİD harada, Nusra harada? O biri cihad qruplaşmaları haradadır? Təbii ki, Şam şəhəri ətrafında yerləşiblər. Bəs niyə Şamda partlayışlar olmur, amma Türkiyənin müxtəlif vilayətlərində terror aktları törədilir? Suriyanın xüsusi xidmət orqanları qruplaşmanın içinə sızıblar. Türkiyədə baş verənlərin qarşısını heç kəs ala bilməz. Bunun ancaq bir yolu var. Suriyanın təhlükəsizlik orqanları ilə əməkdaşlıq etmək lazımdır”.(Ölkə.Az)