Biləsuvarda Tovuz döyüşləri şəhidinin anım günü qeyd olunub
Biləsuvar rayonunun Aşağı Cürəli kəndində Tovuz döyüşləri zamanı şəhidlik zirvəsinə yüksələn baş leytenant Mahmudov Rəşad Rəşid oğlunun anım günü ilə əlaqədar ailəsi ziyarət olunub.
“Report”un Muğan bürosunun məlumatına görə, mərasimdə rayon rəsmiləri, YAP Biləsuvar rayon təşkilatının rəhbərliyi, şəhid valideynləri və ictimaiyyət nümayəndələri iştirak ediblər.
Ziyarətçilər şəhidimizin keçdiyi döyüş yolundan və şücaətindən bəhs edərək başsağlığı veriblər. Qeyd edilib ki, Azərbaycanın 30 ilə yaxın işğal altında olan torpaqlarının azad olunmasına yol açan, Azərbaycan Ordusunun qəhrəmanlıq salnaməsinə qızıl hərflərlə yazılan döyüşlərdən biri də məhz Tovuz döyüşləridir. Artıq üçüncü ildir ki, Tovuz döyüşləri zamanı qəhrəmancasına həlak olan igidlərimizin əziz xatirəsi xalqımız tərəfindən ehtiramla yad olunur.
Daha sonra kənd qəbiristanlığında şəhidin məzarı ziyarət olunub, ruhuna dualar oxunub.
Qeyd edək ki, Azərbaycan Respublikası Prezidentinin müvafiq sərəncamına əsasən şəhid baş leytenant Mahmudov Rəşad Rəşid oğlu ölümündən sonra “İgidliyə görə” medalı ilə təltif edilib.
Mənbə:Report
