Elşad Abbaszadə cəbhənin Tərtər istiqamətində, təmas xəttində 3 il xidmət edib. Martın 25-i qarşı tərəfin atəşkəsi növbəti dəfə pozması nəticəsində cavab atəşi ilə susduranlardan biri də Elşad olub.

ANS-in məlumatına görə, Ermənistan hərbi birləşmələri ilə 3 saat döyüşən qəhrəman silahını dolduran zaman qarşı tərəfin gülləsinə tuş gəlib. Artıq 40 gündür qəhrəmanımız ən uca zirvədə – şəhidlik zirvəsindədir.

Çəkiliş qrupu ötən gün şəhidin ailəsini ziyarət edib, onlara göstərilən qayğı ilə maraqlanıb. Atası Raquf Abbasovun sözlərinə görə, şəhidin dəfn və yas mərasimi üçün Tərtər Rayon İcra Hakimiyyəti və Elşadın qulluq etdiyi hərbi hissə rəhbərliyi maddi kömək göstərib.

Saytların yığılması

10 gün əvvəl isə ailə dövlətin şəhid ailələri üçün ayırdığı 11 min manat sığorta pulunu alıb. Bu aydan isə şəhidin ailəsinə 200 manat Prezident təqaüdü ödənilir. Ailə deyir ki, sığortanın məbləğinin əsas hissəsi şəhidin məzarının düzəldilməsinə xərclənib.

Oğullarını vətənə qurban verən ailə kənardan nəsə ummağı qüruruna sığışdırmır. Amma ailənin 310 manat aylıq gəliri və yaşadığı şərait onların maddi dəstəyə ehtiyacı olduğunu göstərir.

“Şəraitimizin nə yerdə olduğu göz qabağındadır, şəhid bu evdə böyüyüb. Şəraitimiz yoxdur”, – şəhid atası Raquf Abbasov bildirib.

Şəhidin nənəsi Sevil Sadıqova deyir ki, ailənin mənəvi dəstəyə də böyük ehtiyacı var.

“Vətən sağ olsun, xalqımız, millətimiz sağ olsun. İstəyirəm ki, nəvəmin adı əbədiləşdirilsin. Tərtərdə bir küçəyə, bələdiyyəyə, ya kənd icra nümayəndəliyinə adı verilsin. Yalnız onun adı yaşasın”, – Sevil Sadıqova deyib.
Elşad Abbaszadə və onun kimi oğulların qəhrəmanlığı sayəsində irəliləyə bilməyən, əksinə, 25 ildir möhkəmləndiyi mövqelərindən məhrum olan qarşı tərəf bu dəfə ağır artilleriya silahları ilə dinc sakinləri, yaşayış məntəqələrini, məktəbləri və digər mülki obyektləri hədəf seçib.

Erməni mövqelərinin 300 metrliyində yaşayan Zamin Cəfərovun evini aprelin 3-də top mərmisi dağıdıb. Evdə yaşamaq mümkün olmadığından ailə üzvlərini qohumlarının yanına yerləşdirən Zamin səbirsizliklə doğma kəndinə qayıdıb evinin bərpasını gözləyir.

“Evlərə ziyan dəyib. Evlərə darvaza, şüşə gətirib veriblər. Amma belə böyük dağıntılara hələ bir şey demirlər. Çadır veriblər. Böyük dağıntıların təmirinə nə vaxt başlanılacağı ilə bağlı məlumatım yoxdur”, – Qapanlı sakini Zamin Cəfərov bildirib.

Cəbhə bölgəsinə səfər edən, hərbçilər və mülki sakinlərlə görüşən ölkə başçısı dağılmış evlərin bərpası üçün vəsait ayırıb. Yaxın vaxtlarda evlərin bərpasına başlanacaq.

“Nazirlər Kabineti belə qərar alıb ki, mülki əhalinin evinə dəymiş ziyanı Bərpa Agentliyi edəcək. Məcburi köçkünlərə dəymiş ziyan isə Qaçqınkom tərəfindən qarşılanacaq”, – Əli Həsənov deyib.

Son 1 ayda Ermənistan silahlı qüvvələrinin yaşayış məntəqələrini atəşə tutması nəticəsində ümumilikdə Ağdam, Tərtər, Ağcabədi və Goranboy rayonlarında 522 evə ziyan dəyib, 30 nəfərə yaxın mülki şəxs yaralanıb, 6 nəfər isə dünyasını dəyişib.

Saytların yığılması