Gəncə hadisələrində saxlanılanların ailələri görüş ala bilmirlər
Vəkillərin sorğuları cavabsız qalır
Gəncə şəhərinin icra başçısı Elmar Vəliyevə silahlı basqın etməkdə təqsirləndirilən Yunis Səfərovla birgə həbs olunanların ailələri onlarla görüşə bilmirlər.
Məlumatı Meydan TV-yə həbs olunanların ailə üzvləri verib.
Ailə üzvlərinin bildirdiyinə görə Daxili İşlər Nazirliyi, Baş Prokurorluq, Penitensiar Xidmətə dəfələrlə zəng vursalar da, həbsdə olan yaxınları barədə məlumat ala bilmirlər.
İstintaqı Baş Prokurorluğun Ağır Cinayətlərə dair işlər üzrə İstintaq İdarəsi aparsa da, vəkillərdən istintaqın məhz onlar tərəfindən aparılması gizlədilir və vəkillərə müdafiə etdiyi şəxslərlə görüşə icazə verilmir. Olayla bağlı vəkillər müvafiq orqanlara sorğular göndərsə də, onlara heç bir cavab verilmir. Ailə üzvlərinin fikrincə, bu, həmin şəxslərə hələ də işgəncə verilərək bir-birlərinin və digərlərinin əleyhinə ifadə alınmasının davam etməsinə görə edilir.
Yaxınları deyir ki, görüşə icazə verilmədiyindən onlara ərzaq, dərman və zəruri geyim əşyaları apara bilmirlər.
İyulun 3-də Gəncə Şəhər İcra Hakimiyyəti başçısı Elmar Vəliyevə qarşı sui-qəsd törədilib.
Hadisədə əslən gəncəli olan Rusiya vətəndaşı Yunis Səfərov təqsirli bilinir.
İyulun 10-da isə Gəncə şəhərində aksiya keçirilib və həmin vaxt iki polis zabiti qətlə yetirlib.
Bugünə qədər hadisələrə görə 30-dan çox şəxs saxlanılıb.
