Hatayın Dəfnə və Samandağ rayonlarında dünən axşam saatlarında baş verən 6,4 və 5,8 bal gücündə zəlzələlər Yaxın Şərq və Şimali Afrikanı silkələyib. Zəlzələ Suriya, İordaniya, İraq, Fələstin, İsrail, Livan və Misirdə hiss olunub. Zəlzələnin ən çox hiss olunduğu ölkələrdən biri olan Livanda insanlar küçələrə çıxaraq boş yerlərə toplaşıb. Zəlzələdən sonra paytaxt Beyrutun bir çox məhəlləsində insanların evlərini tərk edərək küçələrə çıxdığı müşahidə edilib.
Xüsusilə şəhərdə köhnə qəsəbələrin cəmləşdiyi Tarik el-Cedid və Dahiye məhəllələrində küçələri dolduran insanlar yaxınlıqdakı boş yerlərə toplaşmağa başlayıb. Minlərlə insan Kaş Kaş rayonundakı Horş parkına toplaşıb.
Ailəsi ilə birlikdə gəldiyi parkda AA müxbirinə danışan Nadir Acın silkələnmədən narahat olduqlarını, uşaqların qorxaraq küçəyə çıxdığını bildirib.
Acın, Tarık Əl-Cedid Məhəlləsi sakinlərinin demək olar ki, hamısının küçələrə çıxdığını bildirib.
Digər rayon sakini isə deyir ki, zəlzələdən sonra uşağı və itini götürüb təşviş içində küçəyə çıxıblar.
Bələdiyyə xalqın toplaşması üçün Tarık əl-Cedid Məhəlləsində futbol meydançası açıb.
Beyrutun cənubundakı Şatila Qaçqınlar Düşərgəsinin sakini suriyalı Ziyad ailəsi ilə evdə olarkən şiddətli zəlzələnin baş verdiyini, həyat yoldaşı və uşaqları ilə birlikdə tez bir zamanda çölə çıxdıqlarını bildirib.
Ziyad böyük bir zəlzələdə bütün evlərin dağılacağından narahat olduqlarını bildirdi.
Beyrutun bir çox yerində avtomobilləri ilə boş yerlərə getməyə çalışan insanlar da tıxaclara səbəb olub.
Livan mediasının məlumatına görə, ölkənin şimalında, zəlzələnin episentri Hatay bölgəsinə daha yaxın olan Tripolidə insanlar küçələrə çıxıb.
Vətəndaşlar çoxlu köhnə tikililərin yerləşdiyi şəhərdəki Rəşid Kerame Sərgi meydançasına toplaşıb.
Sahil zolağında yerləşən Akkar, Sayda və Sur şəhərlərində, həmçinin Tripoli və Beyrutda vətəndaşların evlərini tərk edərək avtomobillərində gözlədikləri qeydə alınıb. Həmçinin, stadionlar insanların toplaşması üçün açılıb.
Zəlzələnin Livanda can itkisi və dağıntıya səbəb olmadığı bildirilib.
Livanın Təhsil və Ali Təhsil Naziri Dr. Abbas əl-Halebi zəlzələdən sonra məktəblərin vəziyyəti ilə bağlı yazılı açıqlama verib.
Nazir Halebi, zəlzələ səbəbiylə ölkə daxilində bütün məktəb və universitetlərin bir gün müddətinə dayandırıldığını açıqladı.
Tərcümə“24 SAAT”
