“IV İslam Həmrəyliyi Oyunları bəlkə də 2016-cı ildə Rio-de-Janero-da təşkil edilən Olimpiya Oyunlarından daha yüksək səviyyədə keçirilib”.

Bakıda keçirilmiş İslamiadanın yekunları ilə bağlı mətbuat konfransında gənclər və idman naziri Azad Rəhimov belə deyib.

Saytların yığılması

Nazir oyunların yüksək səviyyədə təşkil olunmasından danışıb.

Azərbaycan idmançılarının iştirakının qüsursuz olduğunu vurğulayan nazir əlavə edib ki, yarışların keçirildiyi 16 idman obyektində hər hansı problem yaşanmayıb.

Yay Olimpiya Oyunları iddiası…

İslamiadanın gəlirlərinə gəlincə, nazir bilet satışı barədə bilgi verib. Onun sözlərinə görə, bilet satışından 3 milyon manata yaxın gəlir əldə edilib.

Mətbuat konfransında gələcək idman yarışları ideyaları haqda da danışılıb.

A.Rəhimov 2024-cü ildə Yay Olimpiya Oyunlarının keçiriləcəyini xatırladıb. Ancaq Azərbaycanın bu yarışa iddia etmədiyini ifadə edib. Bununla belə, nazir 2028-ci ildə Yay Olimpiya Oyunlarına Azərbaycanın iddia edə biləcəyini bildirib.

Mətbuat konfransında iştirak edən Milli Olimpiya Komitəsinin vitse-prezidenti Çingiz Hüseynzadə bundan sonra Yay Olimpiya Oyunlarını bir neçə ölkənin birgə keçirə biləcəyini bildirib.

Onun sözlərinə görə, ola bilsin ki, gələcəkdə Türkiyə və Azərbaycan olimpiadaya birgə ev sahibliyi etməyə iddia etsinlər.

Ancaq IV İslam Həmrəyliyi Oyunlarının xərcləri açıqlanmayıb.

Nazir deyib ki, açılış və bağlanış mərasiminə 20 milyon dolların ayrılması nəzərdə tutulurdu. Hələlik, xərclər dəqiq hesablanmayıb.

Bu ilin dövlət büdcəsində beynəlxalq idman oyunlarının təşkilinə 317 milyon manat ayrıldığı bildirilir.

Bu il mayın 12-dən 22-nə kimi Bakıda IV İslam Həmrəyliyi Oyunları keçirilib. Medal sıralamasında Azərbaycan birinci yeri tutub.

Yarışmada 54 ölkədən 3 mindən çox idmançı iştirak edib. Azərbaycanı oyunlarda 425 atlet təmsil edib.