Oğru tenderin qalibi oldu
14-15 aprel tarixlərində Ailə, Qadın və Uşaq Problemləri üzrə Dövlət Komitəsi (AQUPDK) elektron tender nəticəsində sosial müdafiə və sosial təminat tədbirləri üçün səkkiz satınalmanın qalibini müəyyən edib.
Bu müsabiqə satınalmalarından birinin qalibləri arasında nümayəndəsi 2016-cı ildə 177.2.2 və 177.2.3 (Təkrar oğurluq və mütəşəkkil dəstənin iştirakı ilə oğurluq) maddəsi ilə məhkum olunmuş bir şirkət var.
Dövlət satınalmalarının vahid elektron reyestrinə əsasən, “Apoel” MMC-ə 124 995 manatlıq (73.5 min dollar) müqavilə təqdim edilib.
Tərəflər arasında müqavilə bağlanarsa, şirkət 10 xarici qonağın iştirakı ilə tədbirin təşkilində iştirak edəcək, qonaqlar üçün otel otaqları ayrılacaq və hədiyyələr alınacaq, 100 nəfərlik ziyafət təşkil ediləcək və s.
“Apoel” MMC 2019-cu ilin sentyabr ayında Bakıda yaradılıb. Direktoru Səxavat Tofiq oğlu Cəlilovdur.
Turan İA-nin apardığı kiçik araşdırma nəticəsində məlum olub ki, o qrup şəklində oğurluğa görə məhkum edilib. 30 sentyabr 2019-cu ildə Səxavət Cəlilov daha dörd şirkətin (“Peydj” MMC, “Dudelan” MMC, “EDIS-S.C” MMC və “Velotor”) rəhbəri təyin edilib.
Bu ilin mart ayının ortalarında onlardan biri (“EDIS-SC” MMC) Gənclər və İdman Nazirliyindən iki tədbir üçün (“Tələbə baharı” XIII Ümumrespublika tələbə yaradıcılığı Festivalının və “İdeya var!” gənclərin III Ümumrespublika elmi-yaradıcılıq müsabiqəsinin keçirilməsi) iki müqavilə alıb.
Bu layihələr üçün şirkət dövlət büdcəsindən ümumilikdə 176.4 min manat (103.7 min dollar) vəsait alacaq.
Turan İA-nin suallarını cavablandıran AQUPDK-nin Maliyyə və İqtisadiyyat şöbəsinin müdiri Elşad Kərimov bildirib ki, bu satınalmalar elektron qaydada həyata keçirilib və qalib gələn şirkətlərin qanuni nümayəndələrinin kimliyi barədə onlarda məlumat yoxdur.
“Elektron satınalma başa çatdıqdan sonra sənədlər dövlət satınalmalarını tənzimləyən orqana təqdim olunur. Müqavilə yalnız onun təsdiqindən sonra bağlanır. Sosial müdafiə və sosial təminat tədbirlərinin keçirilməsinə dair satınalmalara gəldikdə, onlar 2019-cu ildən planlaşdırılıb. Koronavirus pandemiyası ilə əlaqədar olaraq onların keçirilməsinə yenidən baxılacağı mümkündür”, – deyə AQUPDK nümayəndəsi qeyd edib.
2020-ci ildə sosial müdafiə və sosial təminat tədbirləri ilə əlaqədar elektron satınalmaların digər qalibləri “Cenevre” MMC, “Baraona” MMC, “Gerkanı” MMC və “Apoko Qrup” MMC olub.
“Apoel” MMC-nin də iştirakı daxil olmaqla, qarşıdakı müqavilələr üçün səkkiz təklifin ümumi dəyəri 810 815 manat (477 min dollar) təşkil edir.
…
Tender-Satınalma-Təchizat, göründüyü kimi, elektron satınalmalar dövlət satınalmalarındakı kölgələri aradan qaldıra bilmir.
24saat.org
Mənbə – azadliq.info
