Vəkillər Kollegiyası 7 vəkili cəzalandırdı
Üzvlük haqqını ödəməyən 2 vəkillə bağlı məhkəməyə müraciət edilib
Vəkillər Kollegiyası ( (VK)) Rəyasət Heyətinin qərarı ilə daha 7 vəkil cəzalandırılıb. Onlardan ikisinin VK üzvlüyündən kənarlaşdırılması üçün məhkəməyə müraciət edilməsinə qərar verilib.
Bu haqda Vəkillər Kollegiyasının dekabrın 14-də yaydığı məlumatda bildirilir.
Vəkillərin cəzalandırılması barədə qərarlar kollegiyanın Rəyasət Heyətinin dekabrın 13-də keçirilmiş iclasında qəbul edilib.
Rəyasət Heyətinin ümumilikdə vəkillər barəsində başlanılmış 40 intizam icraatı barədə rəylərə baxdığı bildirilir. Müzakirələrin yekununda 2 vəkilin fəaliyyətinin dayandırılaraq Kollegiya üzvlüyündən xaric olunması üçün məhkəməyə müraciət olunması barədə qərər qəbul olunub. Kollegiyanın məlumatına görə, həmin vəkillər üzrlü səbəb olmadan üzvlük haqqını 6 aydan artıq müddətə ödəmədiklərinə görə cəzalandırılıblar.
Vəkillə bağlı müəyyən edilmiş səlahiyyətləri aşmaqla qanunvericiliyin tələblərini pozduğu deyilən daha bir Kollegiya üzvünün isə fəaliyyəti 6 ay müddətinə dayandırılıb.
Daha 3 vəkilə töhmət, 2 vəkilə xəbərdarlıq verildiyi bildirilir. Bu cəzaların səbəbələri açıqlanmır. Cəzalandırılan vəkillərin adları da açıqlanmayıb.
27 iş üzrə pozuntu aşkar edilmədiyi, 5 intizam işi üzrə isə əlavə araşdırma aparılacağı bildirilir.
Vəkillər Kollegiyası bundan əvvəl – sentyabrda dörd, oktyabrın sonunda isə 2 vəkilin fəaliyyətinin dayandırılmasına qərar vermişdi.
24saat.org xəbəri Meydan TV-yə istinadən təqdim edir
