Baş Prokurorluğun qərarı Avropa Parlamenti ilə münasibətlərə nə vəd edir?
Mehman Əliyev: “Bu qərar münasibətləri gərginləşdirməyəcək, çünki…”
Azərbaycan Respublikasının Baş Prokurorluğu Avropa Parlamentinin 3 deputatına qarşı cinayət işi qaldırıb. Buna səbəb həmin deputatların erməni işğalı altındakı Qarabağa qanunsuz səfər etmələri, habelə qondarma respublikanın müstəqilliyinə dair fikirlər səsləndirməsidir.
Maraqlıdır, Baş Prokurorluğun bu qərarı Avropa Parlamenti ilə Azərbaycan arasında münasibətləri gərginləşdirə bilərmi?
Moderator.az-a açıqlama verən “Turan” İnformasiya Agentliyinin rəhbəri Mehman Əliyev belə bir gərginliyin yaranacağını güman etmədiyini vurğulayıb:
“Bu addım Avropa Parlamenti ilə Azərbaycan arasındakı münasibətlərin gərginləşməsinə səbəb olmayacaq. Çünki Baş Prokurorluğun bu qərarı qanuna, beynəlxalq hüquq və normalara söykənən bir qərardır. Bu səbəbdən də tərəflər arasında hansısa problemin meydana çıxacağını güman etmirəm”.
