Ermənistan Aİ-yə üzv olmaq üçün tələsmədiyini deyir
Alen Simonyan: “Biz Ermənistanda hələ çox işlər görməliyik”
Ermənistanın hazırda Avropa İttifaqına üzvlük məsələsini müzakirə etmədiyi bildirilir.
Bunu martın 27-də Ermənistan parlamentinin spikeri Alen Simonyan bildirib.
Ancaq Alen Simonyanın fikrincə, bu o demək deyildir ki, Ermənistana üzvlük ərizəsi forması verilib və Aİ üzvlüyünə namizədlik üçün oturub gözləmək qalır:
“Biz müzakirə edirik, anlayırıq, qeydlər götürürük. Biz Ermənistanda hələ çox işlər görməliyik ki, yaxın qonşularımız kimi üzvlük üçün illərlə gözləməli olmayaq. Ermənistanda bir çox standartlar dəyişdirilməlidir”.
Alen Simonyan, sadəcə, indiki mərhələdə bunun müzakirəsini də mümkünsüz sayıb:
“Düşünmürəm ki, bu, baş verə bilər”.
Ermənistanın Strateji Araşdırmalar və Təşəbbüslər üzrə Analitik Mərkəzin (Yerevan) rəhbəri Hayk Xalatyan TRT-yə demişdi ki, Ermənistanın Aİ üzvlüyünə namizəd olmaq təklifi Rusiya ilə kollektiv Qərb arasında gedən geosiyasi mübarizənin bir hissəsidir:
“Qərb üçün Rusiyanın KTMT və Avrasiya İttifaqındakı müttəfiqlərinin və tərəfdaşlarının Kremldən daha çox Qərblə əməkdaşlığa diqqət yetirdiyini göstərmək vacibdir. Ermənistan Aİ üzvlüyünə namizəd olmaq üçün, yəqin ki, Avrasiya İttifaqından geri çəkilməli olacaq. Amma nəzərə almaq lazımdır ki, Ermənistan iqtisadiyyatı bir çox erməni ixracatının ənənəvi bazarı olan Rusiya ilə çox sıx bağlıdır. Rusiya enerji resurslarını güzəştli qiymətlərlə təmin edir və bu iqtisadi boşluq Ermənistan üçün çox baha başa gələ bilər. Üstəlik, Ermənistan hazırda Avrasiya İttifaqında olmaqdan çox böyük fayda əldə edir”.
Halt Xalatyanın qənaətincə, Avropa Parlamentinin təşəbbüsü Ermənistanın namizəd statusu alması prosesinin sürətləndirilməsinin təminatı kimi qiymətləndirilə bilməz:
“Ermənistanın bu yolu Gürcüstan və Ukraynadan tez keçdiyini və ya keçəcəyini söyləmək olmaz. Görürük ki, Ukraynaya böyük vədlər verilib, amma Avropa onları yerinə yetirməyə tələsmir və əslində, Türkiyənin nümunəsi göstərir ki, siz üzvlüyə namizəd statusu ala bilərsiniz, amma probleminizin yekun həllini ala bilməyəcəksiniz. Yaxud biz Gürcüstanın timsalında gördük ki, ölkə institusional olaraq üzvlük üçün ən hazır ölkə idi, lakin geosiyasi səbəblərə görə namizəd statusunu eyni Ukrayna və ya Moldovadan xeyli gec aldı, bu da namizədlər üçün tələbləri daha pis yerinə yetirdi”.
