İlham Əliyev yeni Ədliyyə naziri təyin edib
Yeni nazir Fərid Əhmədovdur
Fərid Turab oğlu Əhmədov Azərbaycan Respublikasının Ədliyyə naziri təyin edilib.
Bununla bağlı Prezident İlham Əliyev fevralın 27-də sərəncam imzalayıb.
Növbədənkənar Prezident seçkilərindən sonra – fevralın 14-də Azərbaycan Prezidenti İlham Əliyev Milli Məclisdə and içib.
Andiçmə mərasimindən sonra qanunvericiliyə uyğun olaraq Nazirlər Kabineti istefa verib.
Kabinetin yeni tərkibində 2000-ci il aprelin 19-dan 2024-cü il fevralın 14-dək Ədliyyə naziri vəzifəsində çalışmış Fikrət Məmmədov yer almayıb.
Fevralın 16-da həmin vəzifənin müvəqqəti icrası Ədliyyə nazirinin müavini Azər Cəfərova həvalə olunub.
Bəs yeni nazir Fərid Əhmədov kimdir?
Yerli medianın yazdığına görə, Fərid Əhmədov 1979-cu ildə Bakıda anadan olub.
2000-ci ildə Bakı Dövlət Universitetində (BDU) hüquqşünaslıq ixtisası üzrə bakalavr, 2002-ci ildə Beynəlxalq hüquq üzrə magistr təhsilini bitirib.
2003-cü ildə “Chevening” təqaüdçüsü olaraq İngiltərənin Esseks Universitetində beynəlxalq insan hüquqları ixtisası üzrə magistr dərəcəsi alıb.
2009-cu ildə doktorantura pilləsi üzrə təhsilini almaq məqsədilə İngiltərənin Oksford Universitetinə “Weidenfeld” təqaüdçüsü olaraq daxil olub.
2016-cı ildə Oksford Universitetinin hüquq üzrə fəlsəfə doktoru elmi dərəcəsini alıb.
2006-2007-ci illərdə Milli Məclis Aparatının İnzibati və Hərbi qanunvericilik şöbəsində məsləhətçi vəzifəsində çalışıb.
2015-2017-ci illərdə “Azərbaycan” Universitetinin rektoru olub.
2017-2020-ci illərdə “Bakı Beynəlxalq Dəniz Ticarət Limanı” QSC-də baş direktorun müavini vəzifəsində çalışıb.
2021-ci ildə Nəqliyyat, rabitə və yüksək texnologiyalar nazirinin müşaviri təyin edilib.
Prezident İlham Əliyevin 2022-ci il 24 may tarixli sərəncamı ilə Rəqəmsal inkişaf və nəqliyyat nazirinin müavini təyin edilmişdi.
