Dünya

İŞİD lideri öldürülüb

İslam Dövləti (İŞİD) cihadçı qrupu dünən – noyabrın 30-da lideri Əbu Həsən əl-Haşimi əl-Qureyşinin döyüşdə öldürüldüyünü bildirib və mövcud gizli dəstələri üçün yeni lider elan edib.

Qruplaşmanın sözçüsünün dediyinə görə, iraqlı Haşimi “Allahın düşmənləri ilə döyüşdə” öldürülüb. Ancaq ölümün nə vaxt baş verdiyi açıqlanmayıb.

ABŞ ordusunu Mərkəzi Komandanlığının (CENTCOM) məlumatına görə, Haşimi oktyabrın ortasında Suriyanın cənubundakı Daraa vilayətində Azad Suriya Ordusu üsyançılarının gerçəkləşdirdiyi əməliyyatda öldürülüb. Komandanlıq onun ölümünü cihadçılara “daha bir zərbə” adlandırıb.

ABŞ Milli Təhlükəsizlik Şurasının sözçüsü Con Kirbi açıqlamasında İD-in alternativ qısa adını işlədib: “İŞİD-in daha bir liderinin Yer üzündə gəzməməsi xəbərini alqışlayırıq”.

İD-in sözçüsü audiomesajda Əbu əl-Hüseyn əl-Hüseyni əl-Qureyşinin qruplaşmanın yeni lideri təyin olunduğunu söyləyib.

Qureyşi Məhəmməd Peyğəmbərin mənsub olduğu, “gəlmələr” mənasını verən ərəb qəbiləsinin adıdır. İD liderləri həmin qəbilədən olduqlarını deyirlər.

2014-cü ildə İraqda və Suriyada sürətlə böyük ərazilər ələ keçirən bu qruplaşmanın elan etdiyi “xilafət” bir neçə hücum dalğasından sonra süqut edib.

Qruplaşma 2017-ci ildə İraqda, iki il sonra isə Suriyada məğlub edilib, ancaq gizli ocaqları hər iki ölkədə hücumları davam etdirir.

Bu il qruplaşma və qanadları başqa yerlərdə, o cümlədən Əfqanıstan, İran və İsraildə hücumlara görə məsuliyyəti götürüblər.

Sözçü yeni lider haqda ətraflı danışmasa da, onun “veteran” cihadçı olduğunu deyib, İD-ə sadiq qrupları dördüncü liderə sədaqət andı içməyə çağırıb.

Qruplaşmanın öncəki lideri Əbu İbrahim əl-Qureyşi bu ilin fevralında Suriyanın şimalındakı İdlib vilayətində ABŞ reydində öldürülüb.

Onun sələfi Əbu Bəkr əl-Bağdadi də 2019-cu ilin oktyabrında İdlibdə öldürülmüşdü.

Ağ evin mətbuat katibi Karin Jan-Pyer (Karine Jean-Pierre) Haşiminin ölümüylə nəticələnmiş əməliyyatda ABŞ-ın roluna dair açıqlama verməyib.

“İŞİD liderlərinin belə sürətli ardıcıllıqda məhvindən məmnunuq. Birləşmiş Ştatlar İŞİD-in qlobal təhdidilə mübarizə öhdəliyinə sadiqdir, beynəlxalq tərəfdaşlarla işləməyə hazırdır”, – o, jurnalistlərə deyib.

ABŞ Suriyada İD qruplaşmasına qarşı hərbi koalisiyaya başçılıq edir.

24 saat” “
İŞİD lideri öldürülüb
” başlıqlı yazını “AzadliqRadiosu”na istinadən dərc edib

Xeberler

Gözdən qaçırmayın:  ABŞ-dan açıqlama! İŞİD-in yeni lideri Əbu Həsən əl-Haşimi əl-Qureyşi öldürülüb

This site uses Akismet to reduce spam. Learn how your comment data is processed.

Back to top button