Kosovonun cənubunda, serblərin daha çox yaşadığı Strpcedə silahlı hücum nəticəsində biri uşaq olmaqla iki kosovalı serb yaralanıb.
Pravoslav Milad bayramının qeyd edildiyi Kosovoda barrikada böhranının sona çatmasından bir həftə sonra hərəkətdə olan avtomobildən atəş açılıb.
Nəticədə biri uşaq olmaqla iki kosovo serbi yaralanıb.
Kosovo polisindən verilən açıqlamada hücumla bağlı bir şübhəlinin qısa müddətdə nəzarətə alındığı, həyati təhlükəsi olmayan yaralıların isə Qraçanicada müalicə altına alındığı bildirilib.
Hücumdan sonra Strpceyə gedən əsas yolun polis tərəfindən bağlandığı, hadisə yerində araşdırmaların davam etdirildiyi qeyd edilib.
Keçmiş serb polisi Dejan Pantiçin saxlanmasına reaksiya verən kosovalı serblər 10-29 dekabr 2022-ci il tarixlərində Kosovonun şimalında qurduqları barrikadalarla yolları bağlayıblar.
Serbiya prezidenti Aleksandar Vucic həbs qərarı ev dustaqlığına çevrildikdən sonra Pantiçin Kosovonun şimalında həbsinə cavab olaraq qurulan barrikadaların götürülməsinə çağırıb.
Serbiya 2008-ci ildə birtərəfli qaydada müstəqilliyini elan edən Kosovonu öz ərazisi hesab edir.
Vaxtaşırı qarşıdurma yaşayan Serbiya və Kosovo, 2011-ci ildə başlanan Belqrad-Priştina Dialoq Prosesi çərçivəsində əlaqələrin normallaşması və nəticədə iki ölkənin bir-birini tanıması üçün ortaq yol tapmağa çalışır. Avropa İttifaqı. (AA)
Tərcümə“24 SAAT”
