”Nardaran işi”: 26 ildir müstəqilik, ancaq azadlığımız yoxdur
Vəkil: “Anlayırıq ki, siyasi məhkəmədir”
Yanvarın 11-də Bakı Ağır Cinayətlər Məhkəməsində Taleh Bağırzadə və digərlərinin məhkəməsi davam edib.
Hakim Əlövsət Abbasovun sədrlik etdiyi iclasda Taleh Bağırzadə çıxış edib.
Bildirib ki, Azərbaycan xalqı özünə layiqli rəhbər seçməlidir:
“Biz xalqın başını aşağı edən rəhbər istəmirik. Sabah nəslimiz bizi susmaqda qınayacaq. Xalqı düşünmədilər, milyardlarını necə gəldi xərclədilər. 26 ildir müstəqilik, ancaq azadlığımız yoxdur. Azərbaycan xalqı rəhbərini özü seçməyib”.
Daha sonra Fuad Qəhrəmanlı, Əli Nuriyev və Abbas Quliyevin vəkili Fəxrəddin Mehdiyev çıxış edib. Vəkil bildirib ki, F. Qəhrəmanlı ailə üzvlərilə görüşə bilmir. O, buna şərait yaradılmasını xahiş edib, müdafiə etdiyi şəxslər barəsində bəraət hökmünün çıxarılmasını istəyib:
“İttihamlar əsassızdır. Cinayət işində faktlar uydurmadır, məntiqsizdir. Fuaddan başqa digərlərinə işgəncə verilib. Hətta buna görə Abbas Quliyev özünə qəsd etmək istəyib. Həbs ifadə azadlığı ilə bağlıdır. Fuad Qəhrəmanlının çıxışlarında talan, zorakılıq olmayıb. İttihamlar absurddur. Fuad Qəhrəmanlı intellektual insandır, ekspert kimi fikrini bildirib. Əli Nuriyev isə sinir xəstəsidir, ailəlidir, azyaşlı uşağı var və heç kimi öldürməyib. Hər üç şəxsə bəraət verilməli, iş bağlanmalıdır”.
Vəkil həmiçinin polislərin zorakılığı ilə bağlı qərar qəbul edilməsini istəyib.
Digər vəkil Fariz Namazlı isə deyib ki, əməliyyata rəhbərlik edən Kərim Əlimərdanov onların yaddaşında təzadlı insan kimi qalıb:
“Deyirlər, Kərim Əlimərdanov namaz qılır. Necə olur həm də işgəncə verir? Çoxlu suallarımız var idi. Lakin o, prosesə gəlmədi. İttihamlar saxtadır. Abbas Hüseynovun telefon danışıqları dinlənilib. Orada heç nə yoxdur. Əgər onlar günahkardısa, onda onları müdafiə edən vəkillər və dəstəyə gələnlər də günahkardır. Bu şəxslərin arxasında Allah dayanıb. Sizin kölgəsinə sığındığınız adamlar isə bir gün sizə xəyanət edəcəklər”.
Vəkillərdən Cavad Cavadlı təqsirləndirilən şəxslərin əməllərində cinayət təqibi olmadığını söyləyib: “26 noyabr Azərbaycan tarixində qara ləkə kimi qalacaq. Cəmiyyətdə çaşqınlıq var idi. Ancaq zaman hər şeyi həll etdi. Sizin verəcəyiniz qərar siyasidir. Yerinizdə olmaq istəməzdim. Anlayırıq ki, siyasi məhkəmədir və tam da olmasa ədalətli qərar gözləyirik. Bəraət hökmünün çıxarılmasını istəyirəm”.
Proses davam edir.
(Meydan TV)
