Ukraynaya tank və PDM-lərin göndərilməsi Moskvanı narahat edir
Bu barədə məlumatı yanvarın 6-da Ağ Evin sözçüsü Karin Jan-Pyer (Karine Jean-Pierre) verib.
Associated Press mənbələrə istinadla bildirir ki, bu paketə onlarca Bradley PDM-lərinin (piyadaların döyüş maşını) daxil olacağı gözlənilir.
Berlin yanvarın 6-də bəyan edib ki, Almaniya bir neçə həftə ərzində Ukraynaya Marder zirehli maşınları göndərəcək.
Almaniya habelə bu maşınları idarə edəcək ukraynalılara təlim verilməsini öz üzərinə götürüb.
Təlimlər Almaniyada keçiriləcək.
Sözü gedən hər iki PDM – Marder və Bradley 25 mm çaplı avtotoplar, 7.62 mm çaplı puleymot və antitank raketləri ilə silahlandırılıb.
Xəbər verilir ki, Ukraynaya ümumilikdə 50 ədəd Bradley və 20-40 arası Marder veriləcək.
Milli Təhlükəsizlik Şurasının sözçüsü Con Körbi (John Kirby) Bradley PDM-lərinin Ukrayna silahlı qüvvələri üçün çox böyük dəstək olacağına inandığını deyib.
O qeyd edib ki, bu PDM-lərdən istifadə üçün təlimləri ABŞ təşkil edəcək.
Tank yox, “tank öldürən”
Körbi vurğulayıb ki, Bradley PDM-ləri hazırda Ukrayna cəbhəsində yaranmış şəraitə tam uyğun gələn texnikadır.
Pentaqonun sözçüsü, briqada generalı Pət Rayder (Pat Ryder) deyib ki, Bradley tank yox, “tank öldürən” maşındır.
AFP qeyd edir ki, Kiyev ona ağır texnikanın verilməsini Qərb müttəfiqlərindən çoxdan istəyirdi.
Lakin müttəfiqlər Moskvanı qıcıqlandırmamaq üçün belə silahların Ukraynaya göndərilməsində tərəddüd keçirirdilər.
Buna baxmayaraq ukraynalıların döyüş meydanında qüvvələr balansını dəyişə bilməsi Qərbi ürəkləndirib.
Bu arada Fransa da Ukraynaya AMX-10 RC yüngül tankarını göndərməyə hazır olduğunu bəyan edib.
Səfir Antonovun narahatlığı
Almaniya habelə bəyan edib ki, ABŞ-ın ardınca Ukraynaya hava hücumundan müdafiə Patriot raket sisteminin daha bir batareyasını göndərəcək.
Beləliklə, Ukraynada Patriot raketlərinin iki batareyası olacaq.
Reuters agentliyi yazır ki, Birləşmiş Ştatlar Ukraynada müharibə başlanandan bəri Kiyevə 21.3 milyard dollarlıq hərbi yardım göstərib.
