Erdogan “Boğaziçi Universiteti”nin rektorunu çıxarmalı oldu
Türkiyə prezidenti Rəcəb Tayyip Erdogan İstanbulun tanınmış “Böğaziçi” universitetinin rektoru Melih Blunu vəzifəsindən kənarlaşdırıb.
Bu bardə iyulun 15-də Reuters agentliyi məlumat yayıb.
Prezidentin fərmanı iyulun 14-də rəsmi mətbuatda dərc edilib, amma əlavə detallar barədə məlumat verilmir.
Reuters yazır ki, keçmiş siyasətçi Melih Bulunun bu universitetə rektor təyin edilməsi bu ilin yanvarından başlayaraq ölkədə kütləvi etirazlara səbəb olmuşdu.
“Boğaziçi” Universitetinin tələbələri və müəllimləri, habelə difər etirazçılar ayağa qalxaraq rektorun istefasını tələb etdilər.
Onlar bu təyinatın qeyri-demokratik olduğunu bildirdilər.
Qərara qarşı çıxan tələbələr və müəllim heyəti bəyan elədilər ki, Melih Bulu-nun rektor vəzifəsinə təyin olunması qurumun qaydalarına ziddir, rektor prezident tərəfindən təyinatla yox, seçim yoluyla müəyən edilməlidir.
Az sonra bu etirazlar paytaxt Ankara və ölkənin digər şəhərlərinə də yayıldı.İstanbul və Ankara da daxil olmaqla bu etiraz aksiyaları zamanı yüzlərlə etirazçı həbs edildi.
Həmin vaxt ölkənin əsas müxalifət partiyalarının liderləri və digər aydınlar da Erdoganın bu qərarına qarşı çıxaraq, onun qeyri-demokratik olduğunu bildirdilər.
Reuters yazır ki, bu aksiyalar, 2013-cü ildən bu yana Türkiyədə baş verən ən böyük kütləvi etiraz idi.
“24 saat” “Erdogan “Boğaziçi Universiteti”nin rektorunu çıxarmalı oldu” başlıqlı yazını “Azadlıq Radiosu”na istinadən dərc edib.
