Pentaqon Ukraynaya daha uzaqvuran silahların verilməsi məsələsinə baxır
Pentaqon Ukraynaya kiçik və ucuz dəqiq vuran mərmilərin verilməsinə dair Boeing şirkətinin təklifini nəzərdən keçirir
Pentaqon Ukraynaya kiçik və ucuz dəqiq vuran mərmilərin verilməsinə dair Boeing şirkətinin təklifini nəzərdən keçirir.
Bu mərmiləri Kiyevin çox sayda malik olduğu raketlərə yerləşdirmək və beləliklə də cəbhə xəttindən arxada və uzaqda olan Rusiya hədəflərini vurmaq imkanı verə bilər.
Xəbər verilir ki, ABŞ və onun müttəfiqlərinin cəbbəxanasında silahlar azalıb və belə bir şəraitdə Ukraynanın daha dəqiq silahlara ehtiyacı var.
Boeing Ukrayna üçün yerdən atılan kiçik diametrli mərmilərin (Ground-Launched Small Diameter Bomb – GLSDB) verilməsini təklif edib.
Bu Ukraynanı silahla təchiz etmək üçün hazırda nəzərdən keçirilən onlarca təklifdən biridir.
Reuters agentliyinin tanış olduğu sənəddə deyilir ki, GLSDB mərmiləri Ukraynaya artıq gələn yazda çatdırıla bilər.
Bu mərmilər GBU-39 Kiçik Diametrli Bombalar (Small Diameter Bomb – SDB) və M26 raketinin mühərrikindən ibarətdir.
Bəzi silahların ehtiyatı tükənir
ABŞ ordusunun baş silah təchziatçısı Daq Buş (Doug Bush) ötən həftə demişdi ki, Pentaqon habelə Ukraynaya 155 mm çaplı top sursatlarının təchizatını artırmağı planlaşdırır.
O qeyd etmişdi ki, hazırda yalnız dövlət müəssisələrində istehsal olunan bu sursatın özəl sektrorda istehsalına icazə verilib.
Strateji və Beynəlxalq Tədqiqatlar Mərkəzinin silahlar və təhlükəsizlik üzrə eksperti Tom Karako deyir ki, məqsəd ucuz qiymətə sursatların kəmiyyətini artırmaqdır.
Ekspert bildirir ki, hazırda ABŞ cəbbəxanasında bəzi silahların ehtiyatı azalıb və ya tükənmək üzrədir.
Karako qeyd edir ki, ABŞ-ın Əfqanıstandan çıxmasından sonra çox sayda havadan atılan bomba istifadəsiz qalıb, lakin onların Ukrayna təyyarələrində istifadəsi problemlidir və buna görə də bu bombaların modifikasiyasına ehtiyac var.
Boeing şərh verməyib
Xəbərdə deyilir ki, artıq az sayda GLSDB dəstləri hazırlansa da onların çatdırılma logistikasında ciddi çətinliklər var.
Bu da qeyd olunur ki, Ukraynanın bu siursatla təchizatı üçün azı altı təchizatçıya ehtiyac var.
Boeing şirkətinin sözçüsü xəbərlə bağlı şərh verməkdən imtina edib.
Birləşmiş Ştatlar Ukraynaya 297 kilometrədək məsafədə olan hədəfləri vurmaq imkanı verəcək ATACMS raketlərini verməkdən imtina etsə də, GLSDB mərmiləri 150 kilometrlik məsafəni vurmaq qabiliyyətinə malikdir.
Ekspertlər deyirlər ki, bu mərmilərin Ukraynaya verilməsi onun əks-hücum əməliyyatlarına ciddi təkan verərdi.
100 kilometrədək uçuş
