Trampın vəkili də koronavirusa yoluxub
ABŞ Prezidenti Donald Trampın şəxsi vəkili Rudi Culianinin koronavirus testi dekabrın 6-da müsbət çıxıb. O, özünü “yaxşı hiss etdiyini” deyir. Culiani Twitter-də dostlarına və izləyicilərinə “bütün duaları və xoş arzuları” üçün təşəkkür edib.
O, xəstəxanaya yerləşdirilməsi haqda ABŞ mediasında yazılanları təsdiqləməsə də, “böyük qayğı gördüyünü” bildirib.
Tramp dekabrın 6-da səhər Twitter-də yazmışdı ki, Nyu York şəhərinin keçmiş merinin testi müsbət çıxıb.
76 yaşlı Culiani prezidentin 3 noyabr seçkisinin nəticələrinə dair məhkəmə iddialarına başçılıq edib. Nəticələr Demokrat Partiyasından Co Baydeninin qalib olduğunu göstərib, amma Tramp nəticələri mübahisələndirib.
Culiani ölkədə koronavirusa yoluxmaların artmasına baxmayaraq, həlledici ştatlara tez-tez səfərlər edib.
Trampın vəkil komandası bəyanatında Culianinin Arizona, Miçiqan və Corciya ştatlarına səfərlərdən öncə test nəticələrinin iki dəfə neqativ çıxdığını bildirib.
Prezident özü də oktyabrda koronavirusdan müalicə olunmuşdu.
24saat.org
Mənbə – azadliq.org